新地+SmarTone 為隔離治療設施建5G網絡

面對嚴峻嘅疫情，黛安知道，較早前新鴻基地產發展有限公司（新地）除咗無償借出兩幅土地，畀政府興建臨時社區隔離治療設施外，集團附屬公司SmarTone日前亦宣布會為10個社區隔離治療設施地點搭建5G網絡，以便醫護人員及入住隔離設施嘅市民隨時可與外界保持聯繫。

SmarTone仲會為社區隔離治療設施嘅市民，免費借用數據卡，而SmarTone客戶亦可獲贈額外免費本地數據及無限本地通話分鐘等，同時會為前綫醫護人員提供5G Wi-Fi路由器及Wi-Fi網絡，等佢哋進行抗疫工作時可更有效率。

SmarTone科技總裁鄒金根話，工程團隊正日以繼夜趕工，希望盡快完成5G網絡工程，配合隔離設施落成使用嘅時間。

公關姊妹話，團隊已率先喺元朗潭尾及新田嘅兩處設施，全速開展5G網絡基建工程，包括興建5G基站、鋪設天綫，同埋光纖／微波傳輸網等，預計呢度嘅工程最快喺未來幾星期內完成；其他設施正積極同政府傾緊，希望盡快完工。黛安覺得新地協助政府抗疫真係不遺餘力，好抵讚！