保良局流動玩具圖書車 佳節送暖

社會上有唔少基層家庭同小朋友需要大家關心，黛安聽聞，全港獨有嘅「保良局流動玩具圖書車」上個月趁聖誕新年，舉辦咗一個「Make a Little Wish聖誕。許願。禮」，活動喺上個月初於「保良局流動玩具圖書車」Fb專頁進行招募，邀請一眾基層小朋友向聖誕老人許願，講下佢哋想收到嘅心儀聖誕禮物。活動舉行當日，由保良局陳黎惠蓮副主席、香港玩具廠商會柯曉泉會長、HK3C協會陳巧儀理事財務長及安基司幼稚園暨國際幼兒園執行校董暨保良局總理蔡加敏等，化身聖誕老人送禮物去小朋友屋企，令到佢哋好開心。

流動玩具圖書車嘅服務對象係幼兒至12歲兒童，主要服務包括定期到訪社區屋邨，提供逾300種特色玩具租借，例如有桌上遊戲、汽車模型、立體圖書等，除咗可即場玩，仲可免費借返屋企，兩星期後歸還。服務同時配合獎勵計劃，提升小朋友愛惜玩具及按時歸還嘅責任感，真係好有意義。各界企業如想捐助「保良局流動玩具圖書車」或共商合作，可致電3462 6260查詢。