信和集團綠色聖誕 廢物回收升級再造

啱啱過去嘅聖誕節，黛安睇咗好多唔同嘅主題燈飾。聽公關姊妹講，信和集團今年同環保機構A Plastic Ocean Foundation及V Cycle合作，更動員集團員工到大埔龍尾進行海灘清潔，收集塑膠廢料，並再造成環保聖誕樹，放喺集團總部、宏天廣場同皇家太平洋酒店展出。

集團亦鼓勵員工收集各類回收廢物，運用創意轉化成再造環保聖誕樹或裝飾，當中逾100棵升級再造而成嘅聖誕樹，已放喺集團旗下嘅物業展出。之前集團亦舉辦咗「愛心聖誕大行動2021」，邀請香港童樂行嘅小朋友到宏天空中農莊參加工作坊，讓小朋友親手回收塑膠廢料，再造成聖誕裝飾，並協助布置廣場嘅聖誕樹，啟發佢哋喺日常生活減少製造廢物。

姊妹話，Sino Club仲喺宏天廣場同空中農莊舉行「樂在UPCYCLE體驗日」，透過工作坊，例如用新鮮咖啡渣製成手工肥皂等，向會員推廣升級再造。