慈雲山中心打造紫色聖誕 點紫波波贏iPhone 13

今個聖誕就算無得外遊，香港都有唔少好去處。黛安收到風，慈雲山中心7樓會搖身一變成為紫色夢幻空中花園，設逾5米高巨型聖誕扭蛋樹同光影隧道，打造一個「『紫』想同你過聖誕主題活動」，同大家一齊過一個開心聖誕。

聽公關姊妹講，只要參加「點『紫』波波大獎賞」，猜中巨型聖誕扭蛋樹入面嘅波波數量，即有機會贏取豐富嘅獎品，包括iPhone 13同Dyson三合一暖風空氣清新機；周末喺指定時間，仲可以免費喺扭蛋樹扭出聖誕禮物，人人有獎㗎！

另外，商場首次同利賓納合作，舉辦期間限定店FUN享健康與歡樂，獨家發售香港首推嘅期間限定利賓納士多啤梨果汁飲品，仲準備咗「紫色聖誕優惠套裝」，裝滿多款含豐富維他命C嘅黑加侖子產品，包括最新推出嘅黑加侖子果凍飲品，同場仲會售賣聯乘多位本港人氣插畫師嘅限定文青精品，可即場加上個人化設計㖭。

姊妹仲話，由即日起只要憑場內指定消費，就可換領限量主題紫色餐具套裝，啱晒開聖誕Party招待親朋啊。