帶媽媽和家傭去太空館

嗰日同喺我屋企做咗超過18年嘅家傭姐姐傾偈，原來佢喺香港咁多年都未去過戲院睇戲。另一個做咗12年嘅姐姐，都話未去過戲院。咁啱太空館7月1日重開，佢哋斥資近3,000萬元更換咗天象廳嘅半球形大屏幕，新設計採用NanoSeam技術，可以喺直徑23米嘅半球形無縫拼接屏幕欣賞節目，反正想帶佢哋同媽咪一齊去睇戲，不如去太空館見識下，睇套新立體球幕電影《穹蒼解密3D》。

太空館1980年開幕，嗰陣時我大約11歲，讀緊小學，第一次到天象廳欣賞裏面嘅天象節目，嗰種刺激、震撼同興奮嘅感覺仍歷歷在目。當時同我一齊喺現場嘅其中一個同學仔，而家仲喺我身邊。諗住帶阿媽去太空館，梗係搵多個人幫手啦；兼且由細到大，呢位同學仔都係超級醒目，有智慧過我，話晒隔咗差唔多40年，扶媽攜家傭再返去呢個老地方，依家變成新地方，我呢個烏龍盲毛梗係捉埋我同學安全啲啦，順便一齊去搵番我哋嘅共同回憶！

記得以前，喺天象廳睇呢度粒星飛去個宇宙，已經覺得好勁。今次睇到天象嘅知識，比我細個時睇嘅更無窮無盡，再解開宇宙奧秘嘅資料，已超前不知幾多倍！真係要向所有研究者致敬，佢哋實在太聰明。我好用心去睇，發覺我實在太唔聰明啦，好多都睇唔明內裏嘅知識，所以我驚媽咪都睇唔明而覺悶，點知佢話佢4歲就睇星星，嗰陣時係唔使畀錢㗎！嘩！原來我媽係咁叻嘅！真可愛！

今次我哋浩浩蕩蕩咁去遊覽太空館，大家都好開心！唔知呢個情景會唔會再有機會，喺40年後，再畀我回憶多一次？到時如果我未死，有可能直情係喺太空上面睇宇宙嘅奧秘！

（本欄逢周四刊登）