曾志偉邀請C君任無綫J2創意總監 矮仔多計創意高層平均身高162cm

TVB近月出現人事大變動，繼曾志偉、王祖藍兩人回巢任職高層後，據悉，TVB內部通訊今日（9月1日）公布「農夫」成員、37歲鄭詩君（C君）出任TVB的J2台創意總監（Creative Director (J2) of Production Division）；曾志偉於今年1月出任TVB副總經理兼行政委員會特別顧問，全面負責綜藝及資訊娛樂節目，王祖藍則出任集團的首席創意官（創意總監），而《晴報》致電C君，他亦親證了消息，出任J2台創意總監一職。

{{hket:inline-image name="27ddddb2e378be12d6e633dfd35cc7dcsaasftp20200221.jpg"}}{{/hket:inline-image}}

鄭詩君接受《晴報》電話訪問，他表示今日第一天正式履新，「係曾志偉邀請我嘅，一直以嚟都有傾節目（製作）嘅嘢，知我鍾意創作，所以搵我試吓！（人工好高？）合適啦！」笑言自己廿幾年沒有返辦公室工作，問到開大會時是否需要穿西裝、打領帶？他笑言：「梗係冇啦！我連台慶都唔會，正所謂著起龍袍都唔似太子。今日工作係填表，好多文件上嘅嘢要填。」

問到未來有甚麼大計？C君說：「等我慢慢習慣吓先啦！好多計劃都有傾，往後慢慢推出。」提到曾志偉曾在訪問中揚言ViuTV收視只能夠與J2台比較，而當中招牌節目《#後生仔傾吓偈》，卻被揶揄由40幾歲的陸浩明主持，缺乏年輕氣息。問到C君會否銳意改革J2？他表示：「呢啲係大人嘅事，由佢哋大人搞啦！我只係做創作，喺節目上嘅創作做得好、過程順利係最重要。」

唔知係事有湊巧定還是因為「矮仔多計」，無綫三名「創意高層」都生得唔高，曾志偉身高159cm、創意總監王祖藍得162cm，而C君有165cm已經係三人之中最高嗰個！唔少網民都表示好欣賞C君，覺得佢非常幽默，希望佢可以為TVB、為J2帶嚟一番新氣象！

{{hket:inline-image name="f4e04e1784da866401abfcdd22507f6b.jpg"}}{{/hket:inline-image}}

C君好友洪永城昨日回應時透露見證兄弟的努力：「見到佢非常勤力，成個八月都埋頭苦幹晚晚幫J2諗節目，我從未見過佢咁忙碌、勤力，相信C君嘅創意、投入幫到手！（你會否幫J2做多啲幕後嘢？）如果佢哋（C君等人）叫到當然會幫手啦！（《凶宅清潔師》擺J2播當響頭炮？）真係唔知道，相信呢個都係佢哋諗嘅元素之一，實質嘅idea就等佢哋公布！」

圖片來源：東星娛樂