《聲夢傳奇》總決賽在星期一（19日）圓滿結束，16歲的炎明熹（Gigi）以大熱姿態狂掃三個獎成為最終贏家，一眾「Gi炎粉」為偶像感到高興，Gigi姑丈、家人及唱歌老師高晨維都為她感驕傲，高晨維更在鏡頭前泣不成聲！她近日在IG撰長文表達賽後感受，更爆出在決賽前夕Gigi壓力大到爆煲！
「三料冠軍」Gigi本名王佳恩，在香港出世，父母與弟妹長居內地，她自細就住在香港姑丈姑媽的屋企，而今次的比賽獲姑丈全程陪伴。高晨維指由Gigi 12歲開始看著她成長，一直與她並肩作戰。「我好清楚Gigi係一個點樣嘅女孩子︰簡單、率真，毫不做作。Gigi兩年幾前一出賽就攞獎，以大部分老師黎講，都一定希望不斷推佢去比賽，贏多幾個獎為（音樂）學校提高知名度；但我喺嗰個時候同姑丈講︰Gigi唔止走到呢一步，佢有條件往更高目標進發，但我哋需要時間去做更高層次訓練，參加太多坊間比賽會阻礙佢，你相唔相信我？停止佢呢一刻再玩比賽？我深深記得姑丈二話不說：『老師，只要你講我就信！你話Gigi唔好再比賽住，我哋就停止參加所有比賽，一切聽你指示』。」
她憶述由那時開始，Gigi就進行特訓，即使無任何比賽，都一直喺備戰狀態，練體能、減肥、練結他、練和音。Gigi在每一次特訓評核中都名列首位，一年後復賽即刻勇奪《第一屆ROCKSTAR歌唱大賽》冠軍。「喺呢一連串特訓完結時，我送咗『炎明熹』呢個名畀Gigi，我希望佢好似熊熊烈火一樣，一直燃燒佢嘅小宇宙，向著夢想進發！喺呢度，好想感謝幫Gigi改名嘅大師Alex師兄！」
高晨維指為Gigi備戰4年，終於迎來《聲夢傳奇》這個大型比賽，碰巧當時Gigi姑丈剛剛退休，可全程做足貼身保母。她指姑丈與其姪女一樣好單純，一心想Gigi參加大型比賽攞經驗，並無計較得獎與否。
不過當時越近決賽前夕，高晨維表示Gigi嘅壓力已經大到爆煲，「網上嘅種種輿論壓力，新聞、網民、節目導師、評審，你一言我一語；喺電視上，大家幾乎再睇唔到喺台上享受唱歌嘅Gigi，大家嘅批評係嚟得幾咁隨心所欲，而唔知道一句隨心所欲嘅說話，影響力係有幾大。」
高晨維憶述在決賽前一日，全程陪住Gigi綵排，但發覺「唔對路」，似有事將會發生。「我同Gigi一齊坐喺觀眾席，捉住佢隻手，我同佢講：Gigi，你知唔知你而家最需要做嘅係乜嘢呀？你一開始好似裝咗半杯好靚嘅清水咁嚟到呢個比賽，慢慢開始，有啲人幫你加啲靚茶葉，你由一杯清水變咗一杯靚茶……再之後觀眾、網民加咗好多五顏六色落呢杯水度……好多顏色好豐富，但係太滿喇！成隻杯都負荷唔到。聽日就決賽，我哋不如今日就將呢隻杯嘅嘢倒番哂出嚟先，將呢隻帶有色彩嘅杯，加番啲清水落去。一陣上到台，任何人嘅意見都忘記佢，再多嘅說話都拋開佢，做番Gigi最擅長嘅一件事，聽音樂，將聲音同音樂融為一體；大家最鍾意嘅Gigi，其實就係最直接、最真誠、最喜歡唱歌，亦係最感動人心嘅Gigi。」
高晨維續對Gigi說︰「如果你感動到自己、感動到別人，如果有人批評你個別呢一句嗰一句嘅小瑕疵，咁可能，連批評嗰個人自己都忘記咗乜嘢係喜歡音樂、欣賞音樂。音樂喺某個程度上本來就唔應該具批判性，人性化嘅演繹先至做到The perfect imperfection！」指Gigi當晚表現正正做到人性化演繹。
她表示Gigi是一個傳奇，不靠運氣、不靠背景只靠真材實料，努力而成功，希望大家可以繼續帶住呢份純真去愛護佢，「好好保護呢一顆心，不被世俗所污染……」又指用負面言詞批評Gigi背景的人極度可恥，「出生喺邊度我哋無得揀，但係可以行到去邊度？依然係每一個人嘅選擇，同為選擇而付出嘅一切。」
高晨維同時提及在決賽當晚，自己於鏡頭前哭成淚人的一幕，「嗰種百感交雜係非筆墨所能形容，經歷一次，可能你比我喊得更厲害！」喊得非常淒厲時，同為《聲夢傳奇》參賽者的黃奕斌（Hugo）用一雙又大又溫暖的手安慰她，「成個比賽播出足足半年，Hugo係唯一一個我完全無同佢講過嘢嘅人！竟然去到最後一日我先第一次面對面同佢講嘢，而佢竟然係喺我完全失控呢一刻安慰我嘅人！我啲學生到底去咗邊呀？雖則當時我實在太激動，完全睇唔清楚Hugo近距離個樣，唯一記得佢誠懇嘅眼神！」
聲夢傳奇｜炎明熹爆姑丈因照顧佢而「變性」？ 淚崩唱歌老師高晨維原來大有來頭 【下一頁】
同場加映：聲夢傳奇│Chantel曾難抵負評打擊偷偷落淚 Yumi感激家人粉絲見證學員成長
U Lifestyle App自家節目登錄《U TV》專區！
↓↓試玩、試食、試用影片任您睇↓↓