將軍澳廣場「拾字看城」字裏行間探索香港

日常生活中，無論街邊招牌或室外告示都不難發現文字工藝，當中唔少屬於本港獨有嘅香港字。最近將軍澳廣場正舉辦「拾字看城」香港字藝展覽，黛安去睇過，順便認識下香港字嘅歷史。

香港嘅霓虹光管字好有特色，仲係昔日外國人對香港嘅第一印象，不過隨住LED燈牌普及，霓虹光管都開始式微，今次展覽就一併介紹霓虹光管字、馬路字、膠牌招牌字、鐵片鑿字同手寫字，以至活字印刷等文字工藝發展嘅歷程，讓大家從「字裏行間」探索香港嘅變遷。

展覽設有3米高嘅合體字牆，牆身有30個現代及有趣新式合體字，可以喺度打卡㗎。展期由即日起到下個月9日，同期仲有一系列工作坊可參加，各位文青萬勿錯過！