冇底褲即掛住老婆│梁漢文內地商演執行李漏帶底褲 助手急買紙底褲 好彩遇到甄子丹

梁漢文（Edmond）最近來回內地和澳門兩地工作，昨晚他又飛到貴州演出賺人仔，期間更在社交網自爆瘀事。Edmond指自己出埠工作前，都會親自執拾行裝，但今次因為時間趕急，自己竟然執漏了底褲，要勞煩助手到便利店購買「紙底褲」頂住，怎料便利店伯伯誤以為要「紫色底褲」，助手於是乎順理成章買了一條正常的紫色底褲給Edmond，令Edmond十分無奈，但又要硬著頭皮接受，他留言：「唔好話畀人聽我聽日着住嗰條底褲係紫色嘅！完.....」引來大批網民瘋狂留言，叫Edmond展示該條紫底褲，認真搞笑。

相關新聞：【留番7對畀自己】梁漢文「斷捨離」捐過百對波鞋 「以為自己係C朗拿度」

{{hket:inline-image name="1.jpg"}}{{/hket:inline-image}}

Edmond今日特別錄了片段回應網民。（影片截圖）

Edmond早前於澳門參予一個帶貨活動，他在席上獻唱首本名曲之餘，又第一次網上直播賣貨，最終活動成交額接近1000萬人民幣。Edmond謂做歌手來講，遊戲節目玩得多，變身網上直播唱歌又賣貨都是第一次，最初公司叫他參予時，也有壓力，怕自己不及網紅吸引觀眾，又不懂如何推銷貨品，他表示：「好彩有2位主播一齊做，聽講嗰晚觀看人數超過一百萬，又話成交額有成千萬，咁我都安樂啲。（成交千萬你分幾多？）分幾多？乜有得分咩？我問吓公司先.....（人地網紅賣枝唇膏賺一億？）唔係啩，我都想賺一億呀，哈哈！」

{{hket:inline-image name="2.jpg"}}{{/hket:inline-image}}

（IG截圖）

昨晚Edmond又飛去了貴州演出，他在社交網上載一個以手指掩蓋嘴鼻的圖片，並自爆瘀事：「今日去咗貴州演出，乜都記得帶，就係唔記得帶底褲，於是助手幫我落去便利店諗住買『紙底褲』頂住先.....」但卻引來助手和店員伯伯一輪妙問妙答，以下是助手和店員伯伯的對話：

助手：伯伯，請問有冇「紙底褲」？
伯伯：「紙底褲 」咩嚟㗎？未聽過喎！係咪男人著喺入面嗰啲？衛生嗰啲呀？
助手：唔係呀！「紙底褲」喎！
伯伯：哦！紫色嘅底褲。

{{hket:inline-image name="IMG_2382.JPG"}}{{/hket:inline-image}}

首次參與內地賣貨直播。（大會提供）

Edmond透露助手最後買了一條紫色的正常底褲回去，他還抵死留言：「宇宙最強甄子丹賣廣告嗰隻比（畀）我，紫色嘅！PS：唔好話畀人聽我聽日着住嗰條底褲係紫色嘅！完......」問Edmond為何忘記帶最重要的貼身物品？難道他平日有「真空」習慣？Edmond大笑道：「唔係呀.....我都唔知自己點解咁低能，哈哈哈，天氣凍要執好多唔同衫去表演，又趕喎，又無老婆喺身邊提我.....帶漏係正常。」事後有不少網民留言給Edmond，「有得你著都好啦，邊有人睇你入面」、「好有畫面」、「偶像平時係咪慣咗唔著架」、「點解唔Post埋條底褲張相？好嘢要一齊分享」，亦有內地網民提醒Edmond，「你應該講：一次性底褲，佢哋先明」。

{{hket:inline-image name="IMG_2385.JPG"}}{{/hket:inline-image}}

（大會提供）

而昨日，Edmond已經身在東莞準備出席其他活動，得知網民反應熱烈，他特別錄了一條片段回應：「估唔到大家對我呢條紫色『底橫』咁大興趣呀，個個都叫我攞條『底橫』出嚟畀你哋睇，好！既然大家咁有誠意.......（扮攞底褲），唔好住，其實我啱啱由澳門過咗貴州，我喺澳門出席咗個購物節，第一次喺節目上幫公司有啲平台賣嘢，好似賣得幾好喎，賣咗千幾萬貨，喺嗰到我可以幫你哋『班』到番嚟㗎，我依家已經身處東莞，大家咁想要呢條紅到發紫嘅『底橫』，我梗係唔會拎畀你哋睇啦，但我可以幫你哋喺到搜購，邊個想要，留言畀我，我喺東莞幫你哋搜購紅到發紫嘅『底橫』，然後寄返嚟畀你哋，你哋留言畀我。」

{{hket:inline-image name="67344c04gy1gl8uy9tlgqj22tc2401kz.jpg"}}{{/hket:inline-image}}

Edmond日前出席第十屆廣州國際燈光節時與粉絲合照。（微博圖片）

Edmond亦自知今次事件十分失策，他解釋：「我一向去第二度做嘢都會自己執自己嘢，每次都一定記得帶呢樣嘢（底褲），但唔知點解琴日可能又有少少急啦，自己遲咗執嘢啦，又晨早出發啦，咁所以漏咗，無辦法喇，離鄉別井做嘢，有時無咗個老婆喺身邊提吓呢樣嗰樣，真係會唔記得咗，下次我一定會帶夠貨去嘅。」為了工作，Edmond已經離家兩個月，他坦言十分掛念家人，得知香港疫情又再嚴重，經常都有電話facetime跟家人及太太聯絡，叫他們盡量不要外出，小心保重身體。

{{hket:inline-image name="67344c04gy1gl8uy57qnpj22c0340e82.jpg"}}{{/hket:inline-image}}

Edmond近日在內地密密工作賺人仔。（微博圖片）

撰文：倪小珊