改名即刻變勤力？

今期我想講下呢排特別hit嘅Kamala Devi Harris，首位女性準美國副總統賀錦麗。

美國總統大選嘅新聞我唔算跟得太貼，不過擁有非裔及亞裔血統嘅準副總統有中文名，引起咗我對佢嘅關注。原來改賀錦麗呢個名，係因為之前喺三藩市競選公職時，不論華裔或非華裔，都會有官方中文名嘅傳統。

而賀錦麗呢個名，就係由佢朋友，三藩市市府婦女委員蘇榮麗已故嘅華人僑領父親蘇錫芬幫佢改。「賀」取自佢姓氏Harris嘅諧音，帶有祝賀嘅意思，「錦」則祝福佢會前程似錦，「麗」則是才貌兼具。而我一位懂名字學嘅朋友，都話佢嘅命帶吉數，為人精明公正、智勇雙全，官運旺，中年成功昌隆，又好似幾啱喎……

當然改名唔係話個名好聽就會行運，都要配合埋自身八字等條件。講下講下，不如就講下改名會否改變到命運呢個話題啦。

其實每一個名字都有佢不同嘅音頻，當長期延續不斷畀人呼喚，就會產生一種力場，加埋呢個人嘅其他條件，包括出生年月日時等，就會結合出一種會有吉凶嘅靈動力嚟支配命運。當然信則有，不信則無。你絕對可以唔認同，而我就信70%左右。

我之前曾經改名叫「陳道然」。改完名後，發覺自己性格變得進取咗。之後叫番做陳淑蘭，性格就變番陳淑蘭了。咁陳淑蘭係乜嘢性格？「懶」是也！

唔係我一個人講㗎，我一位好叻改名嘅朋友，喺未改名時，佢一定唔可以捱眼瞓；當改咗個新名後，做任何事都好搏，甚至可以無得休息都要完成工作。

原本我都想再改過個畀自己可以勤力啲嘅名，但諗諗下，我懶得好開心喎。既然係咁，我一於做番陳淑「懶」。

雖然我自己無再刻意幫自己再改名，但我好用心幫我屋企嘅小朋友改名㗎。例如佢哋叫︰「福來」、「帶金」、「福頭」都唔錯……但其中一個叫「Krug」，諧音rude，果然真係好曳好粗魯。所以有時真係唔到你唔信！

（本欄逢周四刊登）