【居住問題】父親離世變公屋寬敞戶 兩母女被迫大屋搬細屋 抑鬱失業港女感無助：無能力搬【附房委會資料】

本港樓價持續高企，而困擾港人多年的居住問題亦一直難以解決。一名港女日前在網上討論區發帖，指父親去年離世，公屋單位目前只剩她與母親居住；她日前收到房署寄來的調遷表格，指她們已成優先處理寬敞戶，需要大屋搬細屋，並花最少4萬元還原單位再調遷。對此，患有抑鬱症的她因為正在失業，因此感到十分無助：「我都唔想霸住間屋，但而家無能力搬……」

「我自己一個咩都得啦，仲有個阿媽呀！1人公屋單位得120-150呎，我都想像唔到點一齊住。」該名港女昨日（21日）在網上討論區「連登」以「老豆（竇）過咗身，而家係優先寬敞戶」為題發帖，指父母於多年前離婚後，媽媽便帶同她及妹妹搬出去租樓住，而爸爸亦另組家庭，

「佢自己出咗去租屋住，娶咗個大陸女人。」

後來，媽媽因獨力撫養兩姐妹無法再負擔屋租，因而搬回原來的公屋單位，但身為戶主的爸爸一直不肯讓媽媽加名到公屋戶籍上，

「直到一年前老豆過咗身，現在間屋得我一個名，妹妹除咗名準備買樓……我老豆臨死前不斷話要同佢個老婆同便宜仔搬返嚟住，畀間房佢哋。」

她續指，媽媽現年50歲，而她自己則畢業已一年多，沒有太多工作經驗，前一份工為售貨員，目前失業，在新冠肺炎疫情下更是找不到工作。近日，她收到房署寄來的調遷表格，指其單位為優先處理寬敞戶，「搵社工好啲定區議員？寫信要點寫？其實我都係想住多幾年，有返穩定收入先搬，還原間屋佢話要最少4萬蚊。我都唔想想霸住間屋，但而家無能力搬。」由於患有抑鬱症，因此她的情緒經常反覆，

「其實我都知好多嘢有心、想做就得，但我係好反覆，今日我可以好積極好有信心，聽日我可以完全起唔到身。呢排無信心嘅日子多過有信心。」

對於不少網民建議她嘗試不同工作，「失業就出去打住份炒散先，洗碗拖地乜都好啦」，她解釋自己以前試過返餐廳要洗廁所，「我試過所以唔想再做」，而做「兼職女友」她又接受不到，「再搵啲體力勞動嘅工，之後做返文職無人會請」；至於申請綜援，她表示：

「當年離婚媽媽都係自己養大我哋兩姐妹，佢幾辛苦都未諗過要拎綜援。而家我要去到拎綜援都未接受到，諗住有幾耐捱幾耐，唉。」

對此，不少網民十分同情樓主的遭遇，寄語她要努力撐下去，「真係嗰句：馬死落地行」、「啲電器唔要就叫收賣佬上黎收，搬屋幾千蚊搞掂，公屋租金返pt（兼職）都夠頂，之後搵份ft（全職）捱幾年綠表買居屋，加油」、「情緒病都唔多唔少影響你工作能力，你個人好返，先可以努力工作搵錢改善生活」。

不過，亦有網民認為樓主無病呻吟，「有得你住咪好囉」、「又唔係收樓，只係搬細，房署跟返晒政策做」、「房署無留難你，資格上你係要搬去細單位，正路你妹唔應該除名，佢咁掂，叫佢幫下你」、「媽媽50歲唔返得工咩？」

房委會：「寬敞戶」可獲發放搬遷津貼

根據香港房屋委員會（房委會）有關公屋「寛敞戶」調遷的資料，租戶在承租單位後，若因家庭成員遷出、離世、結婚、移民等原因而刪除戶籍，使餘下的家庭成員享有的居住面積超逾既定的編配標準，便成為「寬敞戶」。現時租約條文規定，倘成為寬敞戶，租戶須遷往房委會認為居住面積符合其家庭人數的公屋單位。房委會會分階段處理寬敞戶，首先處理的是「優先處理寬敞戶」個案；根據家庭人數居於超逾一定的面積，而沒長者或殘疾成員的租戶，則會被界定為「優先處理寬敞戶」。

「優先處理寬敞戶」可獲編配最多3次位於原邨或所屬區議會分區內其他屋邨的單位；倘住戶不合理地拒絕接受所有3次編配，會被終止租約。為鼓勵「寬敞戶」調遷，所有「寬敞戶」在遷往細單位後，均可獲發放「 住戶搬遷津貼」，並在資源許可下，可獲提供調遷至新屋邨的機會。

延伸閱讀：

【居住問題·上集】家姐結婚想老公搬入一齊住 港女怕被趕走盼母親「企硬」：生埋B就無㗎喇【查看詳情】

【居住問題·下集】兄長婚後大嫂遷入兼生B 港男慘做廳長瀕臨被趕走 欲搬離減家用反被父親責罵【查看詳情】

每朝索取《晴報》：精明生活．健康家庭．娛樂資訊

責任編輯：李凱晴