【居住問題．上集】港男與妻成功儲錢上車買樓 公屋父母要求一齊住：成世人冇住過私樓要享福

本港樓價持續高企，不少年輕人婚後需與父母等家人同住，甚至因無力解決居住問題而無法成家立室。一名港男抱怨與妻子終於儲夠錢「上車」買樓，期待可以改善生活質素之時，父母竟以「成世人冇住過私樓及要享福」為由，要求一齊住。令他不禁大呻道：「出咗身咁多年我想脫貧喇，點解要嚟拖我後腿？」

該名港男昨日（3日）在網上討論區「連登」發帖，表示自己與妻子成功儲夠錢「上車」，但住公屋的父母得知後要求一齊住，令他大感無奈，

「佢哋話成世人冇住過私樓，要享福，係囉，都怪我廢囉，冇本事買多層樓畀兩老！」

他又對於父母的要求感到憤怒，直斥兩人不顧經濟條件不佳，「明知窮仲生三件」，而且「生著兩件廢青，得我一件出人頭地」。他又指出，自小家中便沒提供太多資源，一切都是靠他自己努力讀書，

「大學學費要自己借，生活費、hall fee（宿舍費用）半工讀自己搞掂吧。」

最後，他按不住怒火炮轟道：

「出咗身咁多年我想脫貧喇，點解要嚟拖我後腿？家用我都冇畀少喇，再畀多啲同幫你養埋兩件廢青冇分別，享福？兩公婆供樓畀你享福？」

此事引來網民熱議，不少人表示理解樓主感受，有人更直言感同身受，「交換，你哋住公屋，租你交，層樓就佢哋住佢供」、「正常係父母幫仔女，仔女有能力過更好，父母應該開心，唔係去加重佢哋負擔」、「香港嘅住房空間咁細仲要逼入去，公屋仲要放棄？傻咗」。

不過，亦有人表示不同意樓主說法，「你點對父母=以後你自己嘅小朋友點對你」、「我覺得自己屋企人，唔使去到咁絕嘅」。有人又建議道：「不如你夾少少錢，畀佢地裝修下間公屋，我覺得你要同佢哋講清楚，又唔係冇得住。」

延伸閱讀：【居住問題．續集】與妻盡花積蓄成功「上車」 港男被公屋父母要求同住 怒極攤牌決定...【查看詳情】

責任編輯：李凱晴