新冠肺炎疫情肆虐，江華與麥潔文的囝囝Bryan陳耀淙身為醫院內科（胸肺科/呼吸科）護士，雖然心中害怕，但仍自願去隔離病房工作，負責照顧確診病人，希望於醫院戰鬥，回家亦會即時入房自我隔離，保護父母。當時麥潔文表示以他為榮，江華仲留言話會跟Bryan一同面對。不少網民都大讚這家人好偉大：「多謝江華kitman教出一個咁好嘅仔，無私奉獻」、「真係好值得驕傲，好有愛心」等。
(相關新聞：乖仔做護士入隔離病房工作 麥潔文唔擔心：我引以為榮)
(江華微博圖片)
(麥潔文微博圖片)
不過日前（23日），麥潔文接受新城電台訪問就表示Bryan最近已搬離屋企，放工直接到政府安排給醫護的酒店暫住，所以她與江華已有幾個星期沒見過兒子：「視像過1、2次，多數都係WhatsApp，但佢好忙，唔會成日覆到。佢話好辛苦，我話唔緊要，你後生要捱吓。」
被問到臨近母親節會否一同食飯慶祝，麥潔文就話不可能，因為Bryan 5月初才會被調出隔離病房，但之後還要自我隔離14日，到時已經5月尾，不過她也沒有介懷，更稱母親節每年都有，現在疫情更重要，更直言感到擔憂：「佢做嘢緊要啲，母親節年年有，但疫情唔係。佢雖然可以調出Dirty Team，但如果唔夠人手又要繼續做。我經常都叫佢小心啲、加油，我好多朋友都有問候佢，幫佢打氣。其實唔止我個仔，所有醫護人員都好辛苦，而我哋咩都做唔到。不過香港算好好，防疫意識好高。」
(麥潔文微博圖片)
另外麥潔文表示自從1月由美國返港後，曾經買不到口罩及廁紙，後來自我封鎖，沒有上堂教唱歌、亦沒有外出食飯或約朋友。最近，她開始有限度咁上堂，但學生人數由以往4、5個減至只有2個學生，坦言不夠交租金：「收入少咗，唔夠交租，業主都好好肯減租2個月，之後要再傾，大家都好明白，業主都要靠租金為生，大家一人行一步。」同時，兩公婆所有演出都要暫停，她原定8月的演唱會，因為疫情加上經濟下滑，所以決定取消；至於老公江華原定6月同顏聯武開騷，現時也要延期。
麥潔文又話：「我依家好似洗盡鉛華咁，好少機會扮靚，同老公日日留喺屋企做吓運動。」她最後提醒大家惟有日常做好個人防疫，減輕醫護工作負擔就是最好的支持。
撰文：張芷晴
責任編輯：楊安莉