擁有一子一女嘅星級爸爸江華雖然自2014年已經好少喺鏡頭前露面，不過近日見到投身醫護界做男護士嘅囝囝Bryan陳耀淙爆紅，被好多網民激讚「好踏實」、「年輕有為」、「有家教」，所以今次都好難得出嚟大談父母經，分享教好仔女嘅最好方法。
▼click以下link知多啲啦
只願囝囝做個好人幫到大家
以前江華俾觀眾形象係好型、好chok，但原來呢位爸爸私底下非常貼地，誓不做怪獸家長，唔會過份管束亦唔會過份寵溺。對於囝囝Bryan，佢話好感恩佢冇夾硬去做明星，反而揀咗自己鍾意嘅工作，服務大眾，為社會作出貢獻：「我係做演員啫，我個女、我個仔係咪一定要做演員呢？從細細個開始我已經同我仔女講，你唔使做第一，唔使做富翁，你學做好人就得，幫人係一個福氣。個仔好細個就攞到呢個道理，有次踏雪屐見到有人跣倒，佢即刻扶佢對方起身。依家佢做護士，喺揸車接佢放工嗰陣我會問佢：『你見到咁多生死，人生觀、價值觀有冇唔同到？』，佢話：『冇呀已經麻木咗』，但我話：『你一定頭要記住點解要做呢份工，嗰份初衷永遠唔好忘記！』我諗做父母最重要係睇到佢做啲有意義，鍾意做嘅東西，所以我見到佢做嘢辛苦唔會心痛，覺得佢做到呢份工係非常有福氣。」
江華覺得Bryan比起囡囡薔天更加明白自己，不過做咗廿幾年父子，點都會有唔了解大家嘅時候，咁江華又點教Bryan？江華憶述：「佢有一次同我講：『阿爸點解你從來都唔讚我？我係咪喺你心目中真係咁唔值得讚，咁冇出色，咁冇用？』，我話：『我話唔係吖，我唔讚你係因為我知道太多人讚你，所以我要俾你知道有啲嘢唔係你想像中咁完美，呢個世界冇厲害嘅人㗎！』」最好笑係Bryan原來有個心結，以為細個嗰陣爸爸同細妹背住自己去沙灘玩，呢件事收埋咗喺心好多年唔敢同爸爸江華講，依家先發現係誤會一場。講到呢度江華都覺得好搞笑：「其實嗰次只係一個專訪要同埋個女出去。」
對於好樂意花錢去旅行，現年25歲嘅Bryan，江華仲想佢明白一個道理：「你今日開心咗，他日就要計數。咁你想行得開心啲，定第日舒服啲呀？做老竇只係想話俾你聽呢樣嘢。」
給予女兒最大自由
至於囡囡薔天，江華竟然坦言好怕同佢傾偈，原來因為佢比較鍾意自由，唔鍾意太黐身，所以江華都俾足空間佢：「我好怕同個女傾偈，佢就係鍾意就睬吓你，唔鍾意就唔睬你，好似高竇貓咁。佢對我先係咁，佢對阿媽就好嗲。我知道佢知我錫佢嘅。」雖然係咁，不過江華又冇氣餒，反而覺得做父母要喺仔女身上學習，唔好俾太大壓力：「我對住我個女、對住我個仔都學緊做人。如果你要同你嘅子女相處，唔好覺得你俾佢嘅嘢係最好先。我個女有一次同我講過：『你話俾我聽咁又唔得，咁又唔得，你咪俾我囉！你咪俾我碰吓釘囉！』佢俾咗啲啟發我。其實我哋有時教細路想佢明理，我哋又係咪真係明理呢？如果你覺得自己好優秀，咁你就會無形中帶俾咗仔女好大壓力，所以同仔女相處會放低我自己，唔係自己想佢好就係好，結局由佢哋經歷。」
演藝路上等待一個人
其實江華成功教到一對咁有家教嘅仔女已經好欣慰，所以佢唔急於拍劇。講返以前拍戲，江華話自己其實唔係做戲，而係將自己變成嗰個角色，所以啲觀眾先會覺得咁入型入格。不過咁樣會搞到自己好難抽身：「點抽返出嚟？唔得㗎，死人㗎唔得㗎！所以我咪唔拍戲囉！」江華又話從來冇將自己當係咩人，只要周潤發想開戲，他就會復出：「喺演藝界係冇人承認江華呢個人㗎，係觀眾承認㗎咋，江華係冇價值。但你問我鍾唔鍾意（拍戲），我鍾意嘅。我有一次撞到周潤發喺九龍城，佢話：『點解你唔拍戲啫？』，我話：『有咩好拍啫？如果你開戲搵我我咪拍囉！』。走嗰陣發哥就話：『我第日有好嘢就搵你』，我話：『係喇，我等你㗎，我其實一路等緊你㗎發哥』」
感謝場地提供：
台北．寬巷子
Shop OT G57, G/F, Ocean Terminal, Harbour City, 3-27 Canton Road, Tsim Sha Tsui