武漢肺炎肆虐，截至昨日﹙5日﹚本港確診患者累計21人，前線醫護人員首當其衝，要抽生死籤，壓力爆煲。不過有位男護士自願去隔離病房，正在等待批准，佢竟然話：「有少少驚，但我更驚嘅係傳咗畀屋企人，我愛我嘅屋企人，所以我入隔離病房係希望可以喺醫院戰鬥之餘，同時保護番佢哋。」呢位就係江華同麥潔文嘅囝囝──Bryan陳耀淙。
(受訪者提供)
Bryan冇跟隨父母嘅步伐做明星，佢覺得醫護行業更加適合自己，喺醫院做內科（胸肺科/呼吸科）護士。佢話呢排醫院內人心惶惶：「好多人虛報旅遊史，一篩查嘅時候中咗先肯認，依家就算話冇旅遊史，我地做嘢都全副武裝。最忙嘅地方就係穿着保護衣同埋除保護衣，要除得正確同埋着得正確會花好多時間。」
相關新聞：【唔係星·二代】江華麥潔文兒子激罕曝光 做男護士甘願1對10
孝順嘅Bryan唔想連累家人，坦言已經有好一段時間冇同爸爸江華、媽媽麥潔文正面接觸：「我幾高風險，要半自我隔離，返到屋企都係唔會見佢哋，一入到屋就即刻沖涼，之後鎖自己喺房度。亦都唔畀佢哋入我房，我房裡面啲嘢全部自己清潔消毒，唔想帶到啲菌畀佢哋。我有教佢哋衛生防疫嘅知識，佢哋都好配合，大家都唔想有事。」
(受訪者提供)
(受訪者提供)
(受訪者提供)
近日疫情嚴重，Bryan表示預防勝於治療，提供咗家中4個衛生貼士畀大家：「屋企重點清潔某啲地方，最高危係門柄、燈制、電話、電視遙控等，用1比99嘅漂白水消毒，最少每日1至2次。第2，確保屋企有流通空氣，倒走花盆積水。第3，餐前、如廁後、處理不潔物品如鞋襪後、或從室外返屋企要第一時間洗手，按照衞生署公布嘅洗手方法至少20秒以上。第4，沖廁時要閂廁所板。」
另外，佢覺得最有效嘅抗炎方法係戴好合規格嘅口罩：「N95唔係個個啱戴，一定要做測試，隨街買有時仲衰過唔戴，因為唔啱你臉型。我見好多人為咗舒服，只係箍實口罩其中一條，其實要一條後腦上面，一條後頸。」不過Bryan就話即使口罩係好重要，都唔好囤積過多口罩：「大家屋企仲有2盒以上就唔好再搶，留番畀真係冇口罩嘅人買。亦希望賣口罩嘅地方(有)良心番少少，大家共同抗疫，唔好發呢啲財，多行不義必遭天譴。」
(受訪者提供)
最後，Bryan呼籲大家有任何類似武漢肺炎、流感嘅徵狀就要睇醫生，等醫生檢查，佢強調：「唔好覺得普通傷風感冒，抖幾日就冇事，風頭火勢千祈唔好博。依家香港通報機制暫時仲好可靠，去診所求診，一有懷疑都會主動幫你安排適當治療，所以唔好猶豫。」
撰文：張芷晴