豬年10大消費新聞選舉 豬肉加價成熱話

聽日就係大年初一，黛安預祝大家新一年身體健康、精明消費。由消委會、《香港經濟日報》、《晴報》及《TOPick》等多家媒體合辦嘅「十大消費新聞選舉」，噚日就公布結果同舉行頒獎禮，黛安每年都有身體力行投票㗎，公關姊妹話今年投票人數多達5,280人，比去年增加超過1成。

得票最高嘅係「非洲豬瘟肆虐內地豬肉拍賣價及平均價均創50年新高」，排第2及第3位嘅係「香港連續9年登全球樓價最難負擔城市置業需不吃不喝近21年」及「香港航空財困空運牌照局一度考慮撤銷其牌照」。頭3位新聞都係關於「食、住、行」，反映大家都好關心民生問題。

香港醫療服務都係消費者關注嘅另一個焦點。好似喺十大消費新聞排第七位嘅「環亞體檢售水貨HPV疫苗清盤另有醫療機構涉賣假疫苗」，同時都獲選為「最大快人心」消費新聞。

消委會主席林定國喺頒獎禮就提到，市民過去一年面對唔少困境，例如要食貴肉、捱貴樓，更要面對遊客大減嘅經濟環境，認真唔容易。政府及業界正積極研究引入唔同來源嘅供港豬，希望填補市場供求空隙，為消費者提供更多選擇。