機場快綫節日優惠 長者半價小童免費

聖誕新年係外遊高峰期，黛安知道港鐵喺下星期一（16日）至明年2月2日會推出特別優惠，搭機場快綫可享長者半價、小童免費，只要係3至11歲小童和65歲以上長者，喺推廣期用八達通搭機場快綫，由香港、九龍或青衣站往返機場站，即可享優惠。

機場快綫喺聖誕同新年期間亦會加強服務，本月22至24日，去機場方向嘅機場快綫列車服務將提早喺早上5點由香港站開出；而26日至明年1月1日，由博覽館站開出經機場站返市區嘅機場快綫就會延長40分鐘，尾班車喺凌晨1點25分開出。