食德好賀10周年頒獎禮 嘉許回收工作正能量

黛安細細個已聽長輩教導，最緊要有衣食，唔好浪費。全港首個食物回收環團食德好對推動食物回收同減廢，一直不遺餘力，眨下眼佢哋原來已成立10年啦，日前就舉行咗個「十周年午宴暨夥伴嘉許禮」，頒贈獎項嘉許一班支持食物回收工作嘅同行者，場面相當熱鬧。

食德好成立於2009年，當時正值香港經歷金融海嘯，物價飛漲，佢哋於是去街市回收被丟棄食物，並分發到有需要人士手中，成為首個到街市回收剩菜嘅社區組織。10年以嚟（截至2019年9月），食德好共回收了1,444噸食物，受惠人次達到336萬，減廢成效有目共睹！

食德好行政總監鄧燕梨上星期五（8日）喺嘉許典禮話，成立初期面對嘅困難真係好多，但喺努力堅持下，終成功建立一個回收同派發食物嘅供應鏈，將食物資源重新分配到基層手上。

做好事梗係唔好畀佢停啦！食德好10周年主題係「人人惜食，代代好境」，佢哋已獲環保基金支持，將開展「惜食在葵青」工作，讓葵青區成為全港首個惜食社區，大家都要繼續支持佢哋呀！