公審車長「無同情心」唔等大肚婆 人夫反被鬧：成車人等你一個？

如果遇到以下情況，各位男士會點做？一名男網民日前在網上發帖公審一名九巴車長沒有同情心，指他趕上巴士時，因其孕妻「行得慢差幾步先到」，而要求車長等一等，但遭對方拒絕；他為此大動肝火罵車長，對方才肯開門等其孕妻上車。不過，樓主並未得到一眾網民的支持，更反被網民斥責自私：「要成車人等你一個，唔會覺得唔好意思？」

樓主：車長沒有同情心

樓主日前在Facebook群組「North District 北區」發帖，指自己未見過「有咁差嘅九巴佬」，一點同情心都無，「我2100喺廣華醫院站搭270A，我老婆係孕婦，我行快幾步，上咗車，我老婆行得慢，差幾步先到，一上車司機即刻關門，同我講唔等得。」

車長：要等喺站等

樓主於是向車長指出妻子有孕，「就到等一陣」，車長聽罷回應指「要等喺站等，唔係車等人」，「我罵佢先好勉強等多幾秒，等到我老婆上車」。至粉嶺花都廣場落車時，樓主更將車長的面容、名字、車牌等資料拍下，再放上群組公審。

網民：公道自在人心

此事引來網民熱議，不少人直言「公道自在人心」，「要成車人等你一個，唔會覺得唔好意思？」、「老婆大肚，正常男人都會叫個老婆唔好跑，唔好追巴士」、「個老婆大肚都唔扶實佢行自己走去追巴士先」、「唔好話司機等唔等先，點解佢唔等埋自己老婆先？」

樓主反被公審刪帖文了事

另有網民認為，車長「等埋係人情，唔等係道理」，「的確有司機唔等人，但如果樓主老婆有喜，就預鬆啲時間唔好搞到行程咁趕，一係就搭的士，一係就等下一班」、「又一個以為大肚婆就大晒的家庭，係要坐就你早啲去巴士站，要幾十人等你一個老婆，人哋成家人喺屋企等緊返屋企呀」。未知是否因公審車長不成反被網民公審，樓主目前已將帖文刪除。