誰對誰錯？1家3口港鐵電梯並排企 打工仔講唔該借借反被鬧

在香港及英國等地，搭扶手電梯時「左行右企」一向都是約定俗成的規則。有打工仔日前在港鐵搭電梯趕返工時，向前面並排站立的1家3口講「唔該借借」後，竟被該對父母拒絕之餘，更被反罵。此事引來網民熱議，有人認為該對父母應遵守「左行右企」的規矩，亦有人認為電梯上根本不應行走。

1家3口並排企

該名打工仔在Facebook群組「生仔要考牌系列」投稿，指上月尾搭港鐵上班途中，從月台搭電梯上大堂時被1家3口「捷足先登」，「個呀(阿)爸就企右邊下面個級，個女3歲左右，就企呀爸上面嗰級，個阿媽就企實左邊拖住個女。」基於「左行右企」的規則，他禮貌地向該名媽媽講「唔該借借」但遭拒：

我好聲好氣同個阿媽講：「唔該借借。」
佢望咗我兩秒唔理我，然後我再拍下佢，話：「我趕時間返工，可唔可以借位畀我？」
佢話：「唔得喎，你見唔到我拖住個女㗎？」
我話：「其實你借一借位比我攝咋喎。」
佢話：「我個女一陣仆親點算呀？」
個呀爸仲要勁撚大聲X我：「趕時間就早啲出門口呀嘛！」
跟住仲聽到個阿媽喺度話：「仲拍我叫我借借喎！都痴(黐)線，見唔到人哋拖住小朋友！」

港爸：趕時間返工跑啊嘛！

臨近電梯頂部時，打工仔拋下「我都廢事同你依啲人嘈」後，便「衝破」1家3口的阻礙離開，「跟住嗰兩公婆仲勁大聲喺後面串我，個呀爸仲大聲叫我：「跑啦！你唔係趕時間返工嘅咩？跑啊嘛！」最後，打工仔在文中表示：「好心你哋個女咁寶貝就唔好帶出街，咁驚佢X街去搭lift啦，仲質問人哋見唔到佢拖住個女！咁喺條街度洗唔洗拖住個女行過，都彈開畀你行晒成條路？」

反對聲音：讓你係人情唔讓亦無錯

網民對此事反應兩極，有人認為根本不應在電梯上行走，「雖然對父母回應無乜禮貌，但扶手電梯係唔應該行嘅，急嘅真係應該行樓梯」、「不嬲左行右企？政府從來唔鼓勵人行電梯喎，讓你行係人情，唔讓人地亦無錯，樓主圍爐失敗啦」、「其實企喺一條電梯阻到樓主幾耐呢？廣告都有教啦，『扶手電梯係會郁嘅機器，搭扶手電梯就要企定定』。」

支持聲音：讓吓人又唔洗死

不過，亦有不少網民支持樓主，「至緊要唔好阻住人，從後攬實阿仔仲安全。讓吓人又唔洗死！」、「只係行右少少一步，呢個動作，讓一讓係咪都會跌親咁大鑊先！」、「有啲站得一條樓梯，仲要喺尾，但你喺車頭，要出嘅出口又喺車頭，唔通行去車尾樓梯上咗又兜返車頭？」、「係唔建議喺扶手電梯上行走，但有時有啲人真係趕時間，咪讓吓畀人囉又唔會少咗忽肉！我就唔信啲人未試過趕時間未試過行，嚴人寬己！」