日式居酒屋 全場料理$60以下

食日本菜不一定要荷包大出血，新開業的246食堂，破格將餐牌劃分成3個價錢︰$20、$40和$60，食物款式由前菜、炸物到刺身、壽喜燒都有，非常抵食！雖然定價便宜，但用料也不遜色，水產由豊洲市場每日新鮮運到，如有重達70kg以上的黑鮪。

$20之選有港人必食的三文魚壽司（2件）、蔥花油甘魚壽司（2件）等；最值回票價一定是雜菜天婦羅，包括了日本番薯、日本南瓜和蓮藕，炸得香脆。

$40亦有不少震撼菜式，例如足25cm長的特大海鰻壽司、大過手掌的炸蝦天婦羅、滿到瀉的三文魚子軍艦等，食一件都已經超滿足！

另外，大三元壽司和海膽富士山雖然要$60一件，不過前者可一次過吃到黑鮪腩和赤身，後者的海膽分量超多，比起賣同等質素的壽司店算平一截。至於最抵食，一定是和牛壽喜燒，誰會想到$60竟然可享用到鹿兒島A4和牛？伴着香甜的湯汁和蔬菜食，非常好吃！

246食堂

地址︰灣仔謝斐道415-421號積福大廈地舖B

電話︰2808 0292

營業時間︰12nn-3pm、6pm-11pm