屋企濕到牆身發霉 強嫂教你去KO【強嫂家務小知識】

大家好啊，又係星期五強嫂啊！今日天氣真係好潮濕啊，你哋睇下個天文台先啦，相對濕度80%-95%！濕濕笠笠嘅天氣，衫又難乾屋企又臭，真係好燥底啊！唔知大家屋企牆身有冇發霉呢？雖然我屋企濕度都好高，不過有我強嫂守護下嘅屋企絕對唔會有呢啲問題啊！

香港潮濕就係人都知㗎啦，不過濕到幅牆發霉一撻撻真係好難攪呢？其實牆身發霉原因有好多嘅，室內室外嘅溫差大，牆身有水氣就會容易出現霉菌問題！

咪話我唔教精你啦，當你見到牆身有霉菌就諗都唔好諗即刻處理咗佢！雖然我成日都讚自己入得廚房出得廳堂，但呢啲絕對唔係得個吹字㗎！首先呢就用塊乾布抹咗啲霉菌先，記住千祈咪用濕布啊！如果唔係啲菌會更容易浸入牆身！

真係想KO啲嚴重少少嘅霉菌，就要用塊乾布加啲消毒酒精殺死啲霉菌佢！如果霉菌係出現喺牆紙上面，紙質同布質嘅牆紙就千祈唔好用濕布抹啦，費事清潔嘅過程上再整霉，呢啲情況就用乾布抹走啲霉菌，唔洗加消毒酒精！最壞嘅情況真係唯有將發霉牆紙撕走啦！不過咪話我唔提你哋啊，處理啲霉菌個陣最好戴返個口罩，費事影響健康啦！

仲有啊！如果床褥訓落覺得濕濕笠笠又臭，你哋不如試下開住個冷氣，幫手吸下濕先！之後再用梳打粉鋪係張床褥表面，等4個鐘之後再用吸塵機吸走啲梳打粉，就可以KO晒啲臭味㗎啦！如果間屋有臭味，就試下將條毛巾加醋，整濕佢再擰乾，掛係窗口吹下，都可以幫助間屋冇咁臭！

唉，講咁多嘢！大家睇吓我個強嫂KO霉菌懶人包啦！

{{hket:inline-image name="keung2.jpg"}}{{/hket:inline-image}}