大家樂區區開年飯 尋「家樂」發放正能量

大家樂年年都會舉辦「區區開年飯」，今年就係即日起至3月23號，喺集團旗下品牌餐廳舉辦38場「區區開年飯」，宴請1,500名基層市民，一齊過肥年！

黛安知道，大家樂今年繼續同香港社會服務聯會，同食物回收組織「食德好」合作推動上述活動。

舉辦38場活動 宴請1500位基層

大會噚日就喺銅鑼灣翡翠明珠廣場Festiva，舉辦「區區開年飯2019啟動禮暨首場開年飯」，40位受惠者即場享用開年盆菜，大家樂集團首席執行官羅德承就話，「區區開年飯」除咗畀街坊朋友聚首一堂，熱熱鬧鬧咁慶新春外，最重要係希望參加者感受到社區對佢哋嘅關懷。

今年大會仲請咗三位同樣叫「家樂」嘅朋友，現身分享「家樂精神」，一齊發放關愛正能量，包括雞檔太子和化粧師蘇家樂、義騎行動發起人兼業餘小丑何家樂，同藝人吳家樂。好似蘇家樂咁，為咗繼承父母衣缽，守住生意，日頭打理雞檔，夜晚就做番自己化粧師本業，無放棄夢想之餘，仲無忘記責任。黛安聽佢講，最鍾意義務幫老人家化粧補影結婚相，見到佢哋開心，就已經好有滿足感。

為咗配合今年「區區開年飯」嘅主題「年年家樂」，集團正式發起「尋家樂」活動！只要姓名上有「家樂」兩字，而又有意藉着自己力量回饋社區嘅話，就可參加。想知道更多，就要請留意大家樂fb公布啦！