宵夜$200 麻辣雞煲+任食安格斯牛火鍋

過了聖誕，又到除夕倒數，狂歡過後當然要宵夜醫肚。旺角火鍋店「火水爐」推出宵夜套餐，每晚10點後入座，每位$178可享兩個半小時食招牌麻辣雞煲，再加任食安格斯牛及超過40款火鍋料打邊爐，抵食！

先歎招牌麻辣雞煲，每2至6位有半隻雞，7位以上則有1隻，以自家調味的麻辣醬炮製，汁醬杰身濃郁，肉質嫩滑，食完會想追加，但先旨聲明，雞煲不是任食。

40款火鍋配料

食完雞件後便注入雞湯，開始打邊爐了。餐廳供應超過40款配料，包括肉類餃類丸類蔬菜粉麵汽水等都是任點。回本必食美國安格斯牛肉，輕焯便嘗到甘甜牛味，另有美國珍寶肥牛可選。西班牙黑毛豬片亦高質，肉質柔軟。

其餘推介包括自家手包餃，鮮蝦雲吞餡料飽滿，傳統鳳城水餃則有木耳、蝦、冬菇及豬肉等。魚蛋、牛丸外，更有多款台灣特色丸子，包括玉米貢丸、墨汁墨魚丸、爆漿魚丸及龍蝦沙拉丸。蔬菜選擇亦多，娃娃菜白菜仔冬瓜片鮮冬菇番茄粟米薯仔。每樣食少少，飽到要捧住個肚走呀！

火水爐冰室火鍋

地址︰旺角煙廠街33號朗廷軒1樓

電話︰2663 1087

營業時間︰12nn-3:30pm、6pm-凌晨2am

備註︰另加一服務費；最後落單時間為1am。

編輯︰魏雋

美術︰招潤洪