馬會延長員工產假至14周 新手媽媽10月中受惠

香港地生兒育女唔輕鬆，尤其係做在職媽媽，家庭同事業要兩兼顧，好多時候未復元晒，就已要放低初生BB返工。不過，馬會嘅姊妹最近就同黛安講個喜訊，原來早前政府施政報告提倡將女士產假延長至14周後，公司都馬上從善如流，即時響應，將10星期有薪產假加到14周，所有全職女員工只要分娩日係10月15日或之後，即刻可享用最新產假安排。

黛安聽到都拍晒手掌，始終依家政府都提倡餵母乳，新手媽媽除咗照顧BB，仲要顧好身體先有足夠奶水，休息時間愈充分當然就愈好啦。今次馬會肯及時改善員工福利政策，為員工身心健康着想，真係好僱主，值得稱讚呀。