服務從業員每天都需應對不同的客人。有從事飲食業的女網民日前透過Facebook群組「巴打絲打 Facebook Club」發文，指自己上菜時不慎弄污客人鞋子，最終需賠償100元購買清潔劑，大呻：「我地做飲食業，有時太忙可能會做錯少少野，但係依個並唔等於我地會因為做錯少少事而要俾人屈錢。」不過網民意見兩極，有人認為食客沒有同理心，但亦有人認為樓主做錯事需賠償是合理。
食客起初索償700元
樓主表示，事發於上周五（5日）晚上大約8時許，「有4位年青人入來食飯，咁我落完單之後，上菜嗰陣唔小心灑左幾滴瑞士汁落相中右邊個位白色衫小姐對鞋上邊，咁我都即時道歉同埋拎紙巾同一杯水比依位小姐去抹，然後有第二位客人要落單，我就去左幫另一位客。」未料，該名女食客叫其經理前來處理，要求樓主賠償700元，「我想息事寧人，就過左去同個位小姐講，不如我請你食依一餐，當係賠罪。」
樓主呻被屈錢
不過，事主的同行男友人表示「唔係請唔請食飯嘅問題」，提出要賠償價值100元的清潔劑，並著樓主立即買回來。樓主表示要先問准經理能否離開，對方則回應「你唔信我就你自己去買」；因此，她只好直接將100元交予對方。最後，她在文中表示：「佢地4個人只係食左2個餐，總值104元。我唔係要求啲咩公道，我只係想大家明白，我地做飲食業，有時太忙可能會做錯少少野，但係依個並唔等於我地會因為做錯少少事而要俾人屈錢，我地啲錢都係辛辛苦苦賺返來，希望大家可以明白我地依啲服務性行業既辛苦之處，多謝大家體諒。」
網民意見兩極
對此，網民意見兩極。撐樓主的網民認為，涉事食客沒有同理心，「人哋已經道咗歉」、「我都係做飲食業，乜客人都會有」、「怕對鞋整污穢就唔好著出街啦，一係笠兩個膠袋嘛」。不支持樓主的網民則認為，涉事食客要求樓主賠償十分合理，「唔要求你賠是人情，要求你賠是道理」、「人地無義務一定要原諒你體諒你」、「你有冇體諒人地都好辛苦賺錢買鞋」、「本來自己下次做野小心啲就完，偷影人放上黎公審都覺得自己啱」。
另有網民認為，今次事件其實是食店的問題，「呢個係公司點解唔幫樓主賠錢，要樓主自己賠既問題」、「大家都慘，但其實你應該找老細賠」。