康泰總部喬遷之喜 推$388激減優惠

黛安收到風，康泰旅行社搬辦公室，總部搬去荃灣中染大廈。為咗慶祝新開張，今日中午12點起，推出「388大激減優惠」，部分旅行團團費更低至$388，仲有多款旅遊產品同時激減，名額有限，記得準時搶！

噚日康泰就舉行咗新辦公室開幕典禮，商務及經濟發展局副局長陳百里、中聯辦經濟部金萍副部長等都有出席恭賀，場面熱鬧。康泰旅行社董事長鍾國頌多謝本港各界同市民一直支持，仲話搬去荃灣區，意味發展重心會同步移向西北。

鍾國頌話，隨住港珠澳大橋通車，可以縮短由香港去中山、珠海同五邑江門等地嘅車程，行程安排上都可以更加鬆動，所以除咗會優化原有行程之外，仲會新增中山或珠海1天遊，最啱鍾意周末快閃嘅港人啦。另外，高鐵香港段通車之後，過關手續會簡化咗，所需時間亦會縮短，大家出行就更方便，康泰將會主力發展車程約5小時內嘅產品，目的地包括潮汕、廈門、桂林、長沙等。

近年，黛安身邊唔少姊妹都話鍾意深度遊，旅行唔再走馬看花，深入體會當地文化。鍾國頌都話係，所以嚟緊康泰會發展深度遊產品，好似深度探索北極嘅冰島、格陵蘭10天團，會特別安排乘坐「海洋鑽石號」由冰島前往格陵蘭。黛安聽完都好想去啊！

為咗比大家更方便訂機票等旅遊產品，佢仲預告，康泰會提升網上銷售平台，為消費者帶嚟煥然一新嘅感覺。