歎酒店級 日式壽司甜品下午茶

位於四季酒店的稻菊，最近改名為四季菊，keep住酒店級水準，同時推出全新日式下午茶，食材來自日本亦不忘講求時令，而且樣樣都好精緻。鹹食由日籍廚師主理，包括長崎縣蟹卷、鳥取縣蟹柳壽司、九州鰻魚壽司，前菜有櫻花豆腐伴北海道鮭魚子，焦點是鮮味十足的北海道帆立貝伴牛油醬油，及燒福井縣鰆魚。

不能錯過的甜品，以來自京都的食用櫻花入饌，製成櫻花啫喱奶凍、櫻味蛋白忌廉卷；又有日本士多啤梨銅鑼燒，甜品師推介猶如白色雪球的椰子酢立（日本青檸）芝士球，不少得京都和果子及兩款鬆餅（原味及綠茶味），邊欣賞維港美景，邊享受春日和風滋味。

四季菊日本餐廳

地址︰中環金融街8號四季酒店4樓

電話︰2805 0600

供應時間︰星期六、日3pm-5:15pm

價錢︰$498/兩位，包括咖啡或茶；$868/兩位，包括香檳兩杯。另加一。