若要說最理想、最心水的Burger，答案可能人人不同。有人認為麵包最重要，有人執着於漢堡扒的肉味質感，甚至只在意Po相後呃到幾多個Like。以下介紹港、九、新界5間不同個性的食店，漢堡造型、餡料、麵包……各有賣點，但相同的是-吸睛又美味。
【港島區代表】灣仔元祖風味 10吋長鰻魚漢堡
多年前，芝士瘋未成氣候，灣仔漢堡小店Burger Home已憑芝心牛肉漢堡彈起。最近在同區搬新舖，地方大了3倍，坐約40人，等大家舒舒服服歎Burger。
店主兼大廚Jacky最拿手整牛肉漢堡，舊店餐牌20多款漢堡中，佔近7成是牛堡，既有手打美國牛肩胛漢堡扒，亦有手打澳洲和牛漢堡扒，想肉味濃定油潤甘香都有得揀。新店繼續以牛行先，新作更飛甩漢堡扒，換上一塊塊牛小排，或一片片鹹牛脷做餡。
可以當扒鋸的安格斯牛小排漢堡，原來有段故。Jacky說︰「舊店初開業時，曾短暫推出過西冷扒漢堡，將成塊薄西冷扒夾進包內，不過一咬便拉出成塊扒，吃起來比較麻煩。」今次揀選的牛小排，是獲認證的美國安格斯牛，肥瘦均勻，肉質軟腍，帶香味，撒黑椒煎至7成熟，配搭香甜燒汁。一個包內夾有3塊牛小排，不妨先單獨品嘗牛小排，用刀叉食，食到尾，又可將剩餘的一片夾Burger，滋味大不同。
鹽燒牛舌漢堡也特別，將幾片煎香的鹹牛脷疊起，賣相立體。鹹牛脷質感煙韌，將它刨成薄片再煎香，增添微脆香口，配搭自製紫蘇醬，Creamy中帶清新。不嗜牛的，也有新口味「原條蒲燒鰻魚漢堡」，鰻魚約10吋長，塗抹鰻魚汁烤香再夾包，長度橫跨了成個Burger，真係要用刀叉食至得。
Burger Home
地址︰灣仔軒尼詩道233號地下B舖
電話︰2662 0201
營業時間︰11:30am-9:30pm
平均消費︰$80
【九龍區代表】屹立大角咀11年 型格墨汁Burger
大角咀有股黑勢力，入侵漢堡包，不但無令人驚怕，更會吃上癮。親愛的黑色，來自墨魚及墨汁，這是首間以墨魚作主題的食店-「神廚館墨東東店」。
對街坊來說，神廚館就似老朋友，因在大角咀已開業11年，最出名是一塊塊鮮甜爽彈的墨魚餅。店子今年初轉型，從茶記變成快餐店，為令墨魚主題更突出，從名字、裝修及菜式都作了大改動，招牌作窩燒墨魚餅太陽蛋飯當然唔少得，更增加多款「墨」漢堡。店主黃小姐話︰「以前都推出過墨魚餅漢堡包，但如果要轉型做快餐店，就要有多些選擇。」於是，餐牌上就有4款包，墨脆堡、墨脆雞堡、墨脆魚柳堡及墨哈蝦堡，全都跟墨魚有關。必食「王牌墨脆堡」，中間那塊厚彈墨魚餅，跟墨魚餅飯的那款，無論材料、製法都一樣，只是外形不同。用菲律賓墨魚柳、麵粉、甘筍、調味及肥豬肉等先攪拌，再用人手起勢撻撻撻，撻到起膠才會彈牙，有柯打時即炸墨魚餅，漢堡可配蜜糖芥末或黑松露醬，前者醒胃，後者濃香。
墨魚膠不止淨食，也能包着蝦肉，墨哈蝦堡內的2隻刺身級虎蝦，外層裹着墨魚膠，鮮爽Double up。
神廚館墨東東店
地址︰大角咀大角咀道61號牡丹大廈地下
電話︰2395 6368
營業時間︰11am-9pm
平均消費︰$50
【新界區代表】荃灣玩轉紅藍綠 日本遊客捧場
荃灣Burger Jobs自創Tiffany blue爆芝流心雞排漢堡爆紅，不單止少女心心眼，連日本遊客也專程來品嘗。以蝶豆花做的麵包，減走麻甩味，增添幾分Elegant。後來，又推出期間限定的香辣雙重和牛漢堡，紅噹噹的麵包用紅菜頭汁做，純天然色調，食得放心。
新作是綠油油的牛油果軟殼蟹堡，這次，店子沒用菠菜、青瓜、青豆、青蘋果之類的物料做綠色「顏料」，索性「原個」牛油果當包。不止有Gimmick，還食正近年牛油果潮。
牛油果滑溜溜，遠望真的會誤以為是麵包。他們揀大Size的荷蘭貨，去皮核後，再橫切成半，就是兩片「麵包」，內裏夾着炸軟殼蟹、自製沙律醬及芝士醬。師傅只愛泰國軟殼蟹，多肉有蟹膏，還帶鹹鮮味。Burger食落香脆又清新，好有驚喜。
Burger Jobs
地址︰荃灣荃興徑2-8號昌泰大廈地下7A舖
電話︰從缺
營業時間︰12nn-11pm
平均消費︰$70
像真素食 Vs.霸氣龍蝦
1. Green Common 未來漢堡
看似普通Burger，其實是來自Beyond Meat品牌，中間的漢堡扒The beyond burger花了7年時間研製，連Bill Gates都有份投資，它不是真肉，而是用豌豆蛋白製造，沒基因改造。營養亦不輸真肉，蛋白質及鐵質更豐富，飽和脂肪較低，更無膽固醇。Green Common引入這塊扒，炮製未來漢堡及未來漢堡Plus。
地址︰尖沙咀廣東道17號海港城海運大廈地下OT G61號舖
電話︰3102 1220
營業時間︰星期一至四，12nn-10pm、星期五至日及公眾假期，12nn-10:30pm
2. Burgerman 連殼龍蝦
Burgerman這款特級龍蝦安格斯牛肉漢堡，應該是挑戰大胃王而設，居然內藏半隻連殼波士頓龍蝦。龍蝦先烚煮再燒烤，面層更有厚厚芝士醬，Yummy！這個非常Burger，當然要用非常方法品嘗，先用刀叉食龍蝦，爽彈鮮甜，快餐都食出西餐Feel。霸氣到極致，更可柯打原隻龍蝦，店子還貼心的備有去殼龍蝦版本，滿足不同要求。
地址︰大角咀埃華街95-97號地下
電話︰2331 3973
營業時間︰11am-10pm
編輯：余運慶
設計：K