粵菜名廚回歸 蟄伏九龍灣等摘星

說起九龍灣，同美食沙漠可謂相差不遠，尤其在工廠區那邊更是吊腳。不過九展附近開了新商廈高銀金融國際中心，終於找到一個超強理由，花15分鐘由德福走過去搵食。

新商廈內有多間高級食肆，打響頭炮的，是旺角朗豪酒店米芝蓮一星名店「明閣」前行政總廚曾超敬師傅主理的高檔粵菜「皇御園」。當年明閣拿到米芝蓮星星與他掌勺不無關係，他離開後往瑞士工作三年，如今歸位，極可能成為下一間摘星的中菜館。

不濫用貴價食材

曾師傅的餐牌基本上無甚花巧，但大師傅手藝在於口味做出鮮香清淡的粵菜精髓。這裏任何一個菜，口味清淡，但又不會嫌淡口，不下味粉之餘亦不會過鹹，更不會有油感膩感。餐廳沒有盲目選用貴價食材抬高價錢劏客，最好例子是叉燒，用回本地鮮豬脢肉，已做到人家西班牙黑豚叉燒的腍滑鬆化水準，老實公道。

這裏同樣有手藝複雜的古法粵菜，最欣賞「孖寶百花片皮雞」，名為孖寶其實一碟有四種元素：雞拆骨攤平煎，底部釀蝦膠及芝麻，賣相一邊是雞、一邊似芝麻皮燒肉；夾着雞吃的甜火腿做工也繁複，用蜜糖煉過兼且撲上包糠炸。全碟最花時間還有配菜的炸藕片，要反覆將蓮藕汆水脫水三、四次，炸起後脆如卡樂B，更有少少淮鹽吊味，叫人食上癮。

皇御園

地址：九龍灣啟祥道17號高銀金融國際中心1樓

電話：3188 2153

營業時間：11:30am-3pm、6pm-10pm

平均消費：午巿$400、晚巿$800

編輯：余敏

設計：招潤洪