米芝蓮廚阿鴻 觀塘開快餐賣叉燒

觀塘東廣場最近開了一間「鴻師傅」快餐店。誰是鴻師傅？就是賣滷水賣到攞米芝蓮的「阿鴻小吃」老闆兼大廚黎偉鴻。

轉攻快餐輕食，阿鴻以拿手的叉燒及一向受港人歡迎的咖喱牛腩做主打，聲稱有信心可以創造出下一個「阿鴻式」傳奇。

新靈感牛腩腸粉

雖說是快餐，但食物做法同款式明顯比坊間快餐店有心思。招牌叉燒在店內自家小量燒製，賣完再燒，保證新鮮；叉燒肥瘦適中、色澤鮮明兼少少燶邊，甘香腍滑。令人感覺年輕的，是除了以叉燒配撈麵外，客人還可選配天使麵、長通粉甚至夾入軟法包中，難得食起來味道配合。

咖喱牛腩則花了兩年時間研究，才做出合心水的顏色同味道。咖喱汁用東南亞入口的咖喱膽加大量乾蔥頭、蒜頭、茄醬等近十款配料煮成，辣度中等，香味富層次；最特別是配腸粉，靈感來自咖喱牛腩河粉，腸粉即叫即拉，超滑溜又富米香，索晒咖喱汁，比炒河更惹味。店子另供應小量蒸飯、泡飯、超足料老火湯同芥末雞腳筋、滷水素鵝等三款阿鴻小吃的熱賣小食，觀塘覓食又多個好選擇。

鴻師傅

地址：觀塘成業街7號東廣場地下G26-G31號舖

電話：2618 0168/2608 0178

營業時間：10:30am-9:00pm

平均消費：$70

編輯：余敏

設計：李明