銀債與定存 孰優孰劣？

新一批銀色債券又再登場，身邊唔少老友記都問曉陽，銀行定存息率仲會唔會升？今次銀債保證回報有5厘，到底買銀債好，定係繼續做定存好？

呢度有兩個問題，第一係銀行定存息率仲會唔會升，另一個係銀債同定存比較，邊個比較優勝。

第一個問題，銀行息率升跌，要視乎美國加息情況。按照現時美國經濟數據，美國依然有機會繼續加息，但就未必會好似之前咁，一口氣加幾厘。

香港銀行嘅息口，一般都跟隨美國息率走勢，如果美國放緩加息步伐，本地銀行水源比較充足，就未必再需要好似之前咁，通過高息嚟搶存款資金，所以估計定存息口繼續走高嘅機會並唔大。

至於銀債同定存比較，孰優孰劣，呢個問題其實好難回答，因為兩者屬性非常相似，例如大家都係低風險、高回報，銀債有5厘，銀行定存都有3至4厘，皆屬於保本又生息嘅產品，所以論風險回報比，兩者打和。

不過，息率保證期有啲分別。銀債主打3年都有5厘高息，但現時高息定存就未必會有咁長嘅年期，部分銀行甚至只係頭幾個月高息，平均回報其實並唔高。

最後一個考慮，就係流動性嘅問題。銀債雖然唔可以好似其他政府債券咁通過二手市場買賣，但政府都提供百分百贖回機制，投資者可以喺期滿之前向政府出售，不會有任何手續費。但定存就有嚴格鎖定期限，任何中途提款都會引致罰息同額外手續費。

（本欄逢周四刊登）