利用複息效應 穩步達至財務自由

同市場部Derek傾開足球，佢慨歎而家英超畀曼城壟斷，睇到好無癮。

曉陽就覺得，今季雖然最終都係曼城後來居上，但其實過程當中都非常精采，包括沉淪多年嘅阿仙奴大翻身、車路士無咗「油王」之後完全係變成二綫波等等。

但最有趣嘅，莫過於忽然發達嘅紐卡素，並無好似大家預期咁變成暴發戶，反而一步一步走上去，的確係球隊經營嘅典範。

紐卡素咁樸實嘅做法，令曉陽諗起一個理財哲學：複息效應（compound interest effect）。

足球同理財又有關係？其實當中東資金入主之後，紐卡素完全可以豪買豪賣，就好似你有100萬，可以攞去買高增長股票，甚至去賭場博一博，一係會賺好多，一係輸到畀人笑。

紐卡素亦都一樣，如果買一大批球員，完全有機會衝擊冠軍，但亦可以因為班底混亂，最後草草收場。

但紐卡素選擇咗穩健，用番100萬作為例子，你投放喺一個固定息率嘅工具，例如每年有5%嘅回報，堅持10年之後，總利息金額可以高達62萬。

一步一步滾存嘅效果，比一步登天要花更長時間，但亦都更有保證。

紐卡素會唔會成功？呢一刻唔知道。但如果你有足夠本金，慢慢運用複息效應，最終一定可以達至財務自由（或者部分財務自由）。

（本欄逢周四刊登）