蓋茨教你規劃人生

做全球首富嘅滋味係點？唔係人人都知，但佢嘅建議，大家不妨都聽下。

話說曉陽同工程部Johnson傾開，佢話工作咗廿幾年，比上不足比下有餘，但人生總係好似有啲缺失；佢早前聽到一個演講，係前全球首富、微軟創辦人蓋茨對大學生嘅一番建議，佢覺得如果自己可以早啲聽到呢啲建議，人生可能行少好多冤枉路。

曉陽好奇到底係咩建議咁厲害呢？原來蓋茨喺北亞利桑那大學嘅畢業典禮上發表演講，分享自己當年未有完成大學就創業，所得到嘅一啲人生啟示。

第一點係人生唔係單一選擇。每個人都會面對抉擇，但做過嘅選擇並非唯一嘅選擇，例如蓋茨曾經以為自己會喺微軟工作一世，但現實係佢最終投入慈善事業嘅懷抱，而且獲得更大滿足感。

第二點係虛心向他人學習。學習新事物可以令自己認識更多，唔好只專注自己擅長嘅範疇；更重要係，懂得喺需要解難嘅時候，尋求幫手，選擇唔同嘅思考模式。

第三點係做啲可以解決問題嘅工作。當你從事嘅工作有機會幫助他人，就會愈有滿足感，同時會令自己更有精力做好呢件事。

第四點係要相信友誼的力量。蓋茨為自己喺大學期間未能夠同更多朋友建立聯繫感到可惜，因為呢啲人有機會成為你嘅同事、網絡，甚至夥伴，而人生最重要嘅價值，正係嚟自朋友。

最後一點，係唔好為工作放棄生活。喺人生當中，有更多事情比工作更重要，例如興趣、婚姻、健康等，而蓋茨亦慨歎自己太遲先領會到呢個真諦。

（本欄逢周四刊登）