第一次不慶祝生日

因為媽咪嘅離世，今年係我第一次唔慶祝生日。古時中國禮節，父母喪期內嘅表現係衡量一個人孝唔孝順。為父母守孝期間，要遵守好多嚴苛戒律，除咗眾所周知嘅守孝3年外，仲有好多事唔可以做，一旦觸犯，將受到法律同道德上嘅譴責或懲罰。現今社會，親人過世後，守喪未必守滿3年，就算守都多數守100日，喺一定期限內，有啲家屬會按照禮俗為往生者服喪以表哀戚之心。

服喪禁忌同禮俗，係對離逝親人表達思念嘅方式，我唔係刻意做呢啲形式，但每年我嘅生日，都必定同媽咪一齊切蛋糕慶祝，兼且每年都會收到佢畀我嘅生日利巿。每次收到，我都寫上年份，將之收藏起嚟留做紀念。呢一切已變成一份令我隱隱作痛嘅回憶同思念。

古時守孝期間，仔女不能有任何享樂，不能食肉飲酒，只能食粥；必須同妻妾分房；唔可以沖涼、剪髮、刮鬍子。守喪者不得嫁娶，不得有任何慶祝活動，不得喺節日時候去拜訪親友。當然，今時今日無乜可能做到唔梳洗3年，只係唔沖涼3日，肯定周邊人唔會讚你孝順，只會話你好臭。所以有啲習俗真係未必做得到。有啲禮俗，我都嘗試去做，例如唔慶祝生日，唔特別去紅白場合，唔剪頭髮，唔去人哋屋企；而今年聖誕同新年，應該唔會將屋企布置得喜氣洋洋。

雖然今年靜靜咁過生日，但好多朋友依然為我送上祝福，擔心我喺生日時會特別掛住媽咪而傷感。我嘅好姊妹們亦特登喺正日，講到明唔係同我慶祝生日，只係請我食飯啫；電台同事亦為我準備咗一個生日蛋糕，我今年唯一嘅蛋糕，真係好sweet。

多謝你哋嘅愛護，我覺得好幸福。

（本欄逢周四刊登）