大家樂醫院飯堂送暖心糖水 答謝醫護無私付出

香港疫情愈來愈嚴峻，醫護人員嘅辛勞和無私付出，令全港市民好感動，大家都希望為佢哋集氣加油！公關姊妹同黛安講，最近大家樂集團發起咗一個「疫下一點甜‧為醫護加油」行動，向一眾醫護送上暖心糖水，以示答謝，認真窩心啊。

公關姊妹話，大家樂集團旗下泛亞機構飲食，會喺全港九及新界共26間經營嘅醫院飯堂，向所有醫護人員送上鼓勵。由即日起至今個月13日期間，醫護人員只要喺指定醫院飯堂，無論午市或晚市時段惠顧任何堂食或外賣食品，都會獲贈1碗暖心糖水，包括紅豆沙和椰汁喳咋等。

逆境下，大家互相扶持實在好重要。姊妹仲話，泛亞飲食喺疫情期間依然繼續維持各大醫院嘅飯堂運作，為醫護人員提供餐飲服務，全力守護香港市民嘅健康，同時希望今次活動可以為一眾醫護人員帶來一點甜，答謝佢哋日以繼夜緊守崗位，為抗疫作出嘅貢獻。相信醫護人員都會感到大家嘅用心同支持，我哋要為一眾醫護人員繼續打氣啊！