與外傭相處之道

每年12月21日，不但慶祝冬至，亦會同做咗20年嘅家傭姐姐慶祝生日。疫情未殺到時，本來我預咗畀佢嘅生日禮物，就係請佢個仔嚟香港玩，等佢哋兩母子可以團聚。但因為疫情，就連家傭姐姐嘅媽媽過咗身，佢都唔可以返菲律賓。

好記得嗰晚屋企請客，當客人離開無耐，佢做好善後工作，突然我聽到佢大喊，我走去佢房睇咩事，先知佢媽媽突然走咗。佢好傷心，當然佢最想可以陪到媽媽，至少可以出席葬禮，但如果返咗去，就一定好難返嚟。其實我都唔知可以點做，所以我非常感激佢。我家嘅毛孩咁健康，全賴有佢！所以能夠搵到一個咁用心嘅好幫手，我真係好感恩。

見到身邊朋友有啲有問題嘅家傭，真係激死。而家外傭好難嚟香港，好多人就算知道個外傭唔合心意，都只可死忍，真係無又煩有又煩。所以我特別感恩，屋企有3個「吉祥三寶」！尤其我媽咪有腦退化症，佢哋真係減輕我嘅心身疲累同壓力。

其實同工人姐姐相處係一門學問。我同佢哋有無拗撬？當然有。但我會真誠咁同佢哋溝通，盡量拆解誤會，如果發現係我有問題，會同佢哋道歉；佢哋有問題，我亦會指出，一定要互相尊重，有獎有罰，唔會凡事遷就。

世上沒有完美嘅人，當然沒有完美嘅僱主或僱員，俗語有話「十隻手指有長短」，我哋同家人相處上都會有摩擦，更何況大家文化背景唔同，所以有啲位作為傭主，都盡量去體諒及尊重外傭嘅感受。日常生活中，僱主要清楚表達自己嘅要求，喺生活細節上訂立清晰指引，咁樣做亦可減少賓主間嘅摩擦。總之，有良好僱傭關係，同擁有一段良好男女關係或親子關係，同樣可令生活更愜意！（本欄逢周四刊登）