畀貼士藝術

對於畀貼士嘅藝術，到今日我都唔係完全領悟到。身邊嘅女朋友都哦過我，話睇我唔起唔畀貼士，或者畀得銀碼太細。佢哋仲同我講，錢使出去愈慷慨，你就會有更多嘅錢返嚟。於是佢哋下下幾百至1,000咁畀，我同佢哋出去，佢哋都畀咁多，我仲使乜畀？兼且嗰啲地方收費上已charge咗service fee，如果服務達標，畀貼士都係應該，但有啲服務態度好似預你奉旨必須畀，咁我一定唔畀！

我朋友話︰「你唔畀貼士，唔驚遭人白眼甚至被拎上網公審咩？」我唔驚喎，貼士對我而言，唔係因為個場合有幾高貴就畀多啲，而係真心感激欣賞對方敬業樂業，畀多多貼士我都好開心。所以通常我畀貼士時都係雙手奉上，真心感激。

近期我畀貼士畀得最窩心開心，就係畀一個做按摩嘅老師傅。佢已經可以退休，但因為佢女兒之前本打算同埋由細養到大嘅金毛尋回犬一起去移民，點知去到機場，隻狗狗點都唔肯入籠上飛機，老師傅惟有同佢一齊返屋企。其實老師傅已經抽到公屋，但因為要養隻狗，所以要放棄公屋，自己租屋住，加上隻狗狗年紀老邁，醫藥費不菲，但老師傅都不離不棄，我好感動，所以每次我都畀貼士佢，而且畀得特別開心，做完按摩第一件事就叫師傅千祈唔好走住，即刻撲去個袋度攞貼士畀佢。

有時去到某啲商場廁所，佢哋唔預你會畀貼士，但見到入面嘅嬸嬸好細心遞廁紙畀洗完手嘅人，我都好欣賞佢哋嗰份敬業嘅態度而向佢哋恭敬奉上貼士。

貼士小費，喺google查到嘅定義，指給予服務人士嘅賞錢，以作表揚個人之用。有時有啲人雖然未必求回報，但做事用心，態度積極，有人賞識，始終都係一種鼓勵。所以我會繼續恭敬地為我遇到嘅服務達人，獻上呢份心意。

請笑納，你應得嘅！

（本欄逢周四刊登）