美心立體蛋糕 品嘗回憶港式小吃味道

香港有好多街頭小食都好吸引，而且滿載本地情懷同舊時回憶。黛安知道，最近美心西餅推出3款新立體蛋糕，將經典嘅香港街頭小吃、冰室美食同西式蛋糕融合，造型像真又趣致，等大家一同品嘗回憶嘅味道。

美心西餅將大人細路都鍾愛嘅「雞蛋仔」、「蛋撻仔」同「奶茶王」，打造成立體造型嘅蛋糕。其中「雞蛋仔」吉士慕絲蛋糕滿載濃郁蛋香，蛋糕夾層係嫩滑嘅雞蛋布丁同吉士慕絲，將地道小食帶至另一個層次；「奶茶王」港式奶茶戚風蛋糕外形則模仿港式凍奶茶，以特調金牌奶茶配方製造紅茶戚風蛋糕，更選用黑白淡奶，順滑香濃且茶香回甘，夠晒港式風味；「蛋撻仔」就係流心奶黃蛋糕，蛋糕採用法國牛油、泰國椰奶及新鮮鹹蛋黃製成，令人回味無窮。