滙豐銅獅子歸位

上星期四朝早，當我仲係攤緊喺張床度聽新聞時，報道講到滙豐嗰對銅獅子會喺當天拆封重見天日，即時有股力量推我起身即刻買滙豐！你咪以為我係股神，我完全唔識投資！

一味喺度大媽講股靠估︰滙豐雄獅再現，滙豐應該雄風可以再現！希望呢次畀我執少少，日後有機食能夠扮下代表。

其實一路都喺度預測話10月會有股災，當蘭子都喺度也文也武學人講股票時，睇怕呢個災難真係有機會發生，大家投資真係要格外小心。

其實當聽到史提芬同施迪再次謹守崗位，我真係好開心㗎！邊個係史提芬同施迪？咪就係屹立喺滙豐總行門外達85年的嘅呢對銅獅子囉。佢哋有名㗎！張口咆哮嗰隻名為史提芬，名字來自當初建議鑄造銅獅的滙豐香港總行總司理史提芬（Alexander G. Stephen）；另一隻合口嘅銅獅子則名為施迪，名字來自1921年滙豐上海司理施迪（Gordon H. Stitt）。

呢對銅獅子係滙豐鑄造嘅第二代銅獅子，喺日本佔領香港期間，佢哋曾被運往日本，準備熔解嚟製造軍火，最終都被運回香港，但喺史提芬同施迪身上，則多咗子彈痕，即係話佢哋真係好擋得殺氣！

你咪笑我八卦，至少到我交稿日為止，銅獅解封股價即彈，滙控曾漲3%，見逾一個月高位，所以我更加即刻去中環，摸下又攬下呢對銅獅，逐隻喺佢哋耳邊同佢哋講︰「Please give me some luck！Please give me some money！」

唔知點解，當去到現場見到佢哋，真係好鬼開心。打從心底內嘅感情湧出嚟。可能係因為佢令我諗番細細個嘅時候，滙豐獅子錢罌陪我一起成長嘅點點滴滴……因此我絕對相信，史提芬同施迪一定會give me money give me luck...

哎呀，對唔住！佢哋唔係屬於我一個，而係屬於香港人的！所以我絕對相信，史提芬同施迪會守護香港，give us luck！

（本欄逢周四刊登）