忘不了那忘不了

有一次，半路中途我由錄音室出嚟聽到林超榮（超人）眉飛色舞咁不停講︰「忘不了，忘不了……」搞到我好八卦想知佢忘不了甚麼？哦！原來佢講緊食「忘不了」。

忘不了魚Empurau，正式英文名為Mahseer，產地位於馬來西亞砂勞越詩巫拉讓江上流加必以及下流峇拉加兩段水域，是馬來西亞第一淡水名貴魚種。此魚游速為河魚之首，生存喺高原森林內，清澈水流急湍嘅石頭堆之間，生性聰明，難以捕捉。

忘不了魚鍾意食風車果，所以魚肉帶一股淡淡果香味，清蒸味道最正，連魚鱗都可以酥炸嚟食，的確係魚中極品。如果要引進出售，需要長期投餵風車果餵飼，一般要等佢生長3年、體重達4至5斤時先達到最佳食用口感，所以成本極高。

馬來西亞只有當地土人先至有資格得到政府嘅批准，去捕捉呢種野生河魚。佢哋要坐船往森林中進發尋寶，隨時一、兩日都未必返到嚟，碰上雨季時分就更難有收穫。

更麻煩係忘不了捉到之後仍會亂彈亂跳，為免保存困難，一般都會即時急凍或冰鮮，先至唔會因掙扎而破壞魚身，所以一般野生的忘不了除價錢極高之外，更加係一魚難求。

聽完超人旁述咗忘不了嘅身世後，我點可能放過呢條魚？點可以放過超人？

經我日哦夜哦，每次見面都問佢幾時請我食，終於喺上星期，超人喺佢嘅「濟記飯堂」請客食忘不了，而面皮幾呎厚嘅我得知，即刻有殺錯無放過叫佢加多一雙筷！嘻嘻……我終於能如願以償了！

我喜歡這魚質地肥美之際，清香的魚油包裹在嘴內，而魚鱗大大塊又帶些煙韌……果然食得過癮！

下次我唔使求超人帶了！因為我已經知架步，識得打電話去濟記飯堂訂枱了！

（本欄逢周四刊登）