【居住問題·上集】家姐結婚想老公搬入一齊住 港女怕被趕走盼母親「企硬」：生埋B就無㗎喇

本港樓價持續高企，不少市民無法安居樂業，年輕人更是難以「上車」成家立室。一名港女近日大吐苦水，指姐姐打算婚後讓丈夫遷入她們家中，令她擔心兩人會反客為主霸佔居所後將她趕走，更憂慮其單親家庭本來「成屋女人」，突然「多個男人」會不方便，遂希望媽媽「企硬」反對，令姐姐的「如意算盤」打不響，「我好驚我媽媽會應承呀......唉，我點算好？」

姐姐私下問媽媽 婚後丈夫可否搬來住

一名24歲港女近日在網上討論區「連登」發帖，指姐姐欲於明年結婚，更私底下問媽媽婚後丈夫可否搬來住，

「（姐姐）想老公搬入嚟一齊住，問我媽媽好唔好，我媽媽話要諗吓……唉真係好麻煩，最怕之後趕唔走咋，住住吓當正自己屋企。」

媽媽事後詢問其意見，而她亦坦言「唔想」，「一直都係成屋女人，突然多個男人好唔慣」。她指出，父母在她就讀中一時離婚，自此兩姐妹便由媽媽撫養成人；而現時三母女所住的700呎居屋有3房，物業為媽媽名下，而媽媽亦已辛苦供完。媽媽曾說過，兩姐妹要結婚就搬走，單位是留給自己養老，但姐姐竟然仍提出過分要求，

「由細到大都係我媽媽養我哋兩個，再供埋層樓，我最驚佢哋搬入嚟霸咗間屋咋！生埋B就無㗎啦，一定畀佢哋趕走，惟有叫我媽媽企硬！」

姐姐為「月光族」 以前亦曾提出類似要求

她續指，姐姐與未來姐夫現年27、28歲，未來姐夫亦是在單親家庭長大，住公屋的他沒有自己房間，「以我所知我姐夫就好慳，但我家姐好大使。」她指出，姐姐為「月光族」，沒有幫手供樓之餘，亦沒交家用，以前亦曾經提出類似要求，

「早幾年，我家姐都話想佢Ex（前男友）搬入嚟住，我媽媽話唔可以，阿妹仲細唔方便，希望今次我媽媽都企硬啦。」

她又認為，姐姐與未來姐夫絕對不會考慮租屋或買樓，「淨係知佢哋諗住買車，買樓就未必……我諗我家姐唔會出去租，因為屋企裝修完無耐，好新淨。」她直言與姐姐的關係時好時壞，「佢唔發港女脾氣就無事」，但幾年前一次吵架後，「我凌晨出咗去樓下坐，佢即刻鎖門唔畀我入屋，最後我去咗朋友（家）瞓咗一晚。」

網民苦勸要「企硬」阻止 事主透露母親終極答案

不少網民均認為她要堅決反對，「請神容易送神難，遲啲生咗B就會話要唔夠空間叫你走」、「企硬啦，佢地肯定想踢走你霸走間屋，你走咗再迫埋你媽媽獨佔」、「咩叫引狼入室咪就係呢啲case」、「大把真人真事，真係唔好心軟，冇能力就咪結婚，想結婚咪一齊捱囉」。

對此，女事主表示已直接就此事詢問姐姐，但對方竟回應「無啊，無咁快結婚」。同時，她又指已逼媽媽「表明意願」，

「頭先我同咗我媽講，咁我又結婚，我又搬入嚟住。我媽話：兩個都無得搬入嚟！」

延伸閱讀【居住問題·下集】兄長婚後大嫂遷入兼生B 港男慘做廳長瀕臨被趕走 欲搬離減家用反被父親責罵【查看詳情】

每朝索取《晴報》：精明生活．健康家庭．娛樂資訊

責任編輯：李凱晴