運動員上山執垃圾 「大奇迹日」山野清徑

大家面對疫情威脅更應注重健康，郊外有樹木空氣又新鮮，令唔少人愛上行山，但垃圾問題亦隨之而來。黛安知道香港男子擊劍運動員張小倫同香港女子武術運動員莫宛螢等人好有心，上周日（31日）參加咗「五區山野大奇迹日」喺郊外執垃圾，為推動「山野不留痕、自己垃圾自己帶走」出一分力。

今次嘅「五區山野大奇迹日」係由信義會鞍山探索館、野外動向同Kolon Spor舉辦，參加者於5月31日星期日早上9點半，由鞍山探索館出發，由於天氣不穩定，加上前一晚落紅雨，於是大會改為往鹿巢山山腰位置「清徑」，一直行至中午12點半，再返回鞍山探索館為垃圾分類。

兩位參與活動嘅運動員同黛安分享，張小倫話，今次參與收集垃圾令佢大開眼界，「之前都有去行山，見啲人大包細包攞上山，跟住兩手空空落山，就知佢哋將啲垃圾掉咗喺邊！」莫宛螢就話，今次活動幾袋幾袋垃圾咁執落山，可想像平時清潔姐姐有幾辛苦！佢哋都話，因為疫情令奧運同好多海外比賽都取消或延期，所以會操多少少，keep住體能，準備隨時都以最佳狀態參賽。