85歲高錕太太的不老秘技 活到老動到老

即使踏入暮年，都唔等如垂垂老矣。「光纖之父」高錕太座黃美芸就係「活到老，動到老」嘅最佳例子。馬會公關姊妹同黛安講，年屆85歲高齡嘅高太，原來最愛做運動，而且十分有恒心，唔單止每星期打2、3次網球，連落雨都照去跑步，閒閒地每次運動1、2個鐘，唔少後生仔都追唔上。最令黛安佩服嘅係，高太喺60歲時仍有勇氣同魄力玩滑翔傘，佢仲話如果有來世，佢想做雀仔，「飛來飛去，十分自由」。

作為科學家嘅太太，高太雖然羨慕雀仔，但亦會理性反思「自由鳥」也要面對覓食嘅辛苦，仲有被捕食嘅危險。呢種「凡事均有兩面」嘅學習態度，都幫到佢克服照顧患腦退化嘅丈夫嘅困難。高太笑言，高校長患病初期，佢有時都忍唔住向丈夫發脾氣，但見到對方好驚，就知道自己做錯，開始學習以笑相待，即使是「假笑」，扮扮下都會成真。難怪高太成日都咁樂天，一啲老態都無。想學習多啲高太嘅「不老秘技」，睇下點規劃人生精采嘅下半場，記住要睇今期馬會《駿步人生》喇。