北角匯仿真櫻樹秘境俘虜少女心

近月全球航班因為新冠肺炎疫情而瀕臨癱瘓，唔少日本迷只能夠喺fb望住「家鄉」嘅櫻花美景興嘆。黛安收到風，原來北角匯外面嘅海濱長廊整咗個粉嫩櫻花秘境，啱晒大家假日去唞唞氣，打打卡。公關姊妹同黛安講，今次特登以東京隅田公園櫻花做藍本，整咗20株巨型仿真櫻花樹，仲加埋日式燈籠同園藝燈飾，等大家「日影‧夜影」都一樣咁有feel。姊妹教路，如果想影到「夜櫻」醉人景色，一定要用埋燈海做背景，咁就夠晒唯美浪漫啦。

同場仲有一田超市嘅「春桜祭‧日本食品期間限定店」，有齊大熱限定花漾銘茶啤酒，同木村櫻大福、正氣屋製菓櫻花花瓣啫喱等多款春季限定人氣零食，一定歎到最純日式賞花風味。

商場仲搵咗超過40個品牌聯手搞「櫻花陣」，時尚、美粧、餐飲產品都有齊。如果大家想去影靚相，記住即日起至下個月31日前抓緊時間喇，「北角匯櫻花祭」係免費入場，開放時間係每日「朝十晚十」㗎。