旅行社免費派口罩 助港人齊心抗疫

新型冠狀病毒肺炎肆虐，大家都好積極做防備，外出必定戴口罩防疫，但可惜「一罩難求」，唔少市民為撲口罩，都要捱更抵夜排隊，非常徬徨！好彩香港有唔少善心商戶，免費送口罩畀市民。

黛安知道，EGL東瀛遊公司管理層之前啟動危急應變小組，不停聯絡日韓嘅合作夥伴搵口罩，希望幫助到有需要嘅香港人；而佢哋由上星期五（31日）起，每日派籌畀排隊市民，每位限獲5個口罩，去到噚日（3日）已經免費派發咗約1.5萬個口罩，真係令人好感動啊。

另外，縱橫遊WWPKG亦都喺日本唔同縣市成功搜羅逾10,000個口罩，仲已安排用空運盡快運回香港；佢哋今個星期就率先預備咗4,000個口罩安排送畀鄰舍輔導會，解決安老院長者、護士、保健員及社工的燃眉之急。而餘下嘅口罩亦將會陸續運到，再送畀有急切需要嘅慈善機構。縱橫遊話今後會繼續集合更多物資，盡努力繼續去幫助有需要嘅香港人。病毒雖然可怕，但大家齊心抗疫，各界大眾互相幫助，黛安相信香港一定會平安度過。