11歲小歌手唱遍3大音樂廳 成港最年輕第一人

歌聲可以感動人心；黛安知道，年僅11歲嘅黃詠彤因為喺唔同國際賽事獲獎、表現出眾，所以獲邀喺美國卡內基大廳、英國皇家亞伯特音樂廳，同埋維也納音樂廳演出，成為香港最年輕踏足3個世界著名音樂表演場地嘅表演者，年紀輕輕已完成第一個音樂夢，真係好厲害啊。

據黛安所知，詠彤6歲時已考獲英國皇家音樂學院聲樂五級，11歲考獲倫敦聖三一音樂學院聲樂八級，亦係英國威爾斯「靈閣嶺國際音樂節」71年來最年輕嘅個人得獎者。詠彤細佬綽康，亦係美國卡內基大廳百多年歷史以來，最年輕嘅個人音樂表演者，非常厲害。

詠彤而家先得11歲，前途無可限量！佢話之後除咗繼續參與唔同嘅世界音樂賽事同演出，第二個音樂夢想就係希望參與製作及主演音樂劇。依家佢已開始撰寫第一個音樂劇故事，準備聯同喺音樂路上認識嘅香港及世界各地音樂家一齊完成；黛安好期待佢嘅作品啊，詠彤要繼續加油！