樂做醫生治療病人 陳沛然︰救人成前進動力

今個農曆新年，大家講得最多嘅一句祝福話，相信一定係「祝你身體健康！」黛安一向認為，有健康嘅體魄真係最緊要，尤其依家面對咁嚴峻嘅疫情！而喺呢啲關鍵嘅時刻，各位醫護人員對病者嘅付出，就更加令人敬重。

黛安最近就同身兼醫生嘅立法會議員陳沛然見過面，佢話自己由2016年10月至今做咗3年幾議員，但都係享受做醫生，就算公立醫院工作已轉做兼職，分半個人來處理立法會工作，但所有事都仍以醫院工作為優先，「作為醫生，平時救援工作係一個一個咁救，治療好一個病人已可開心兩個星期，亦成為向前行嘅動力。」

反修例引發嘅衝突持續大半年，有醫護游走衝突現場義務急救；陳沛然醫生就笑言，自己現已習慣揹上重8公斤嘅急救大背包出入，內有唔同嘅急救治療裝備，有時為踢波更將波鞋、波衫通通塞入去背包內。半年以來，陳醫生話收得最多嘅就係感謝卡，數十多張感謝卡都係市民寄來向他發聲致謝，坦言感覺好特別。

設備技術提升 不憂慮本港疫情

議會生涯仍未完，遇上反修例風波，現時又要面對武漢肺炎的疫情；陳醫生就認為，不論新醫生或中生代醫生都已經歷過沙士，當年醫生一個N95口罩持續多日使用，頂多外加一層日日換的外科口罩，現時就已經設有隔離病房，硬件、軟件上已經同當年大不同，「當年沙士都頂得住」，所以佢都不擔心本港情況。黛安亦提提大家，記得做足防護措施，包括戴口罩、勤洗手等等，總之小心為上，不可鬆懈！