表彰推動港日經濟交流 蒙德揚博士獲頒旭日中綬章

香港同日本嘅交流好密切，黛安知道，信興集團主席兼行政總裁蒙德揚博士喺促進日本同香港文化交流，以及推動日港之間嘅經濟同商業發展都貢獻良多。蒙博士喺去年11月於令和元年秋季嘅外國人授勳中，獲日本政府頒授「旭日中綬章」以作表揚，仲係唯一獲授勳嘅香港人，日本駐港總領事館特意喺前日（13日）進行咗表彰儀式，認真可喜可賀啊。

黛安仲知道，蒙博士喺2014年就任香港日本文化協會會長後，曾舉辦日本傳統節慶夏祭和演奏會等活動。2016年為協助日本熊本市民走出地震傷痛及進行災後重建，香港日本文化協會仲發起捐款活動，蒙博士除咗以私人名義捐款，亦喺信興集團旗下338間店舖設置「加油BOX」供市民捐款，活動共籌得超過100萬港元。

前日日本駐港總領事和田充廣就代表日本政府，向蒙博士頒授「旭日中綬章」（The Order of the Rising Sun, Gold Rays with Neck Ribbon）。和田充廣大使話，無論喺經濟定文化領域，蒙博士都為推動日本同香港發展友好關係貢獻良多。黛安都戥蒙博士開心呀。

蒙博士對於獲頒授「旭日中綬章」亦表示深感榮幸，佢話會繼續促進日本與香港之間文化交流，亦非常期待喺2020年東京奧運會出一分力！