心源畫會邀本地畫家 辦畫展交流藝術

都市人生活壓力大，得閒睇下藝術品可以洗滌心靈，尤其係睇到名家嘅作品，簡直係賞心樂事。黛安收到風，由一班香港畫家組成嘅「心源畫會」，明日（10日）起至13日將會喺中央圖書館舉辦畫展，參展嘅會員畫家連同特邀著名畫家超過50位，陣容非常強勁。

黛安要介紹一下，心源畫會係喺2016年成立，佢哋由幾十位熱愛繪畫藝術嘅人士組成，畫會經常舉辦藝術交流、觀摩、講座、示範等學術活動。會員更會將所長用於回饋社會，包括曾捐出作品畀東區醫院，去年起更為愛護動物人士嘅寵物義畫肖像，籌得善款就悉數捐畀KAS流浪動物收容中心，真係好有心。

黛安知道，心源畫會今次畫展嘅主題為「探索.跨越」，參展會員畫家共有39位，畫展特別邀請到本港14位著名畫家展出作品，包括沈平、廖井梅、廖小平、王秋童、王無邪、石俊、朱達誠、林天行、韋勁敏、陳朝龍、黃孝逵、趙志軍、熊海同陶傑。畫展開幕禮喺今個星期六（11日）下午3點舉行，4點就有畫家對談會，鍾意藝術嘅姊妹記得去參觀！